छत्रपती संभाजीनगरच्या विद्यार्थिनीची नवी मुंबईत आत्महत्या, प्राचार्यावर गंभीर आरोप, गुन्हा दाखल

Student Suicide News: पनवेलमधील एका नर्सिंग कॉलेजमध्ये शिक्षण घेत असलेल्या एका विद्यार्थीनीने आत्महत्या केल्याची घटना घडली आहे. या प्रकरणात कॉलेजच्या प्राचार्यावर गंभीर आरोप केले गेले असून, पोलिसांनी गुन्हा दाखल केला आहे. 

Navi Mumbai Crime news: एका १९ वर्षीय विद्यार्थीनीने आत्महत्या केल्याची घटना समोर आली आहे. छत्रपती संभाजीनगरची विद्यार्थीनीनवी मुंबईतील पनवेलमध्ये असलेल्या एका महाविद्यालयात नर्सिंग अभ्यासक्रमाचे शिक्षण घेत होती. तिने महाविद्यालयाचे वसतीगृहातच गळफास घेऊन आत्महत्या केली. विद्यार्थीनीचा प्राचार्याकडून जातीवरून अपमान करून मानसिक छळ केला जात होता, अशी माहिती समोर आली आहे. या प्रकरणात पोलिसांनी कॉलेजच्या प्राचार्याविरोधात गुन्हा दाखल केला आहे. 

'लोकमत'चं WhatsApp चॅनल फॉलो करा!

पनवेलमधील पोयंजे गावात असलेल्या नर्सिंग महाविद्यालयात ही घटना घडली आहे. मिळालेल्या माहितीनुसार, विद्यार्थीनी छत्रपती संभाजीनगरची असून, ती अनुसूचित जाती प्रवर्गातून येते. 

पनवेल पोलिसांनी दिलेल्या माहितीनुसार, ती खासगी नर्सिंग कॉलेजमधून बीएससी नर्सिंगच्या पहिल्या वर्षात शिकत होती. महाविद्यालयाच्या वसतिगृहात राहत होती. ३ जून रोजी तिने महाविद्यालयाच्या वेस्टबॅण्ड वसतिगृहातील तिच्या खोलीत गळफास घेऊन आत्महत्या केली. 

प्राचार्याकडून जातीवरून छळ

दरम्यान, या प्रकरणी विद्यार्थीनीच्या आईने दिलेल्या तक्रारीवरून पोलिसांनी प्राचार्याविरोधात गुन्हा दाखल केला आहे. प्राचार्याकडून मयत विद्यार्थीनीला जातीवरून हिणवले जात होते. तिला टोमणे मारले जात होते. गेल्या काही महिन्यांपासून तिला वारंवार मानसिक त्रास दिला जात होता, असा आरोप करण्यात आला आहे. हा छळ असह्य झाल्याने तिने आयुष्य संपवले. 

वाचा >>सोनम रघुवंशी प्रेग्नंट? लग्नाला महिना झाला! मेघालय पोलिसांकडे वैद्यकीय अहवाल आला

प्राचार्याविरोधात आत्महत्येस प्रवृत्त केल्याप्रकरणी, तसेच अट्रॉसिटी कायद्यानुसार गुन्हा दाखल करण्यात आला आहे. पोलिसांनी सांगितले की, या प्रकरणात अद्याप कोणतीही अटक झालेली नाही. या प्रकरणाचा आम्ही तपास करत आहोत. साक्षीदार आणि महाविद्यालयातील कर्मचाऱ्यांचे जबाब नोंदवण्यात आले आहेत. सर्व महत्त्वाचे पुरावे गोळा करण्यात आले आहेत.