प्रियकराबरोबर जाण्यासाठी रचला स्वत:च्या मृत्यूचा बनाव;‘दृश्यम’ चित्रपटावरून सुचली भयंकर कल्पना

पळून जाण्याच्या तयारीत असलेल्या गीता आणि भरतला अटक करण्यात आली. 

पाटण :गुजरातमधील पाटण जिल्ह्यात एका विवाहित महिलेने आपल्या प्रियकराच्या मदतीने एका पुरुषाचा खून करून, त्या मृतदेहाला स्वतःचे कपडे घालून पेटवून दिले. आपला मृत्यू झाल्याचे सर्वांना भासवता येईल म्हणून हा धक्कादायक प्रकार तिने केला. ‘दृश्यम’ चित्रपटामुळे ही भयंकर कल्पना सुचल्याने तिने स्वत:च्या मृत्यूचा बनाव तिने रचला, असे पोलिसांनी सांगितले.

पोलिसांनी गीता अहिर (वय २२) आणि तिचा प्रियकर भरत अहिर (२१) यांना पालनपूर रेल्वे स्थानकातून अटक केली आहे. प्रियकर भरतला एक मृतदेह शोधून आणायला गीताने सांगितले. तळ्याजवळ अर्धवट जळालेला मृतदेह नागरिकांना सापडला. त्यावर गीताचा घागरा व पैंजण असल्याने ती गीताच आहे असे वाटले. मात्र, हा मृतदेह सोळंकी यांचा असल्याचे लक्षात येताच पळून जाण्याच्या तयारीत असलेल्या गीता आणि भरतला अटक करण्यात आली. 

भरतने केला हरजीभाई सोळंकीचा गळा दाबून खून

गीताने ‘दृश्यम’ आणि ‘दृश्यम २’ हे दोन्ही चित्रपट पाहिले होते. त्यातून प्रेरणा घेऊन तिने आपल्या मृत्यूचा बनाव रचला. त्यासाठी भरतने हरजीभाई सोळंकी या गृहस्थाचा गळा दाबून खून केला व त्याचा मृतदेह जाळला. त्यानंतर ते पालनपूर रेल्वे स्थानकावर आले.