"जब-जब जुल्म, तब-तब जिहाद", महमूद मदानी यांच्या वादग्रस्त विधानावर भाजप म्हणाला 'व्हाईट कॉलर दहशतवाद'; काँग्रेसचीही प्रतिक्रिया
By ऑनलाइन लोकमत | Updated: November 30, 2025 00:40 IST2025-11-30T00:38:05+5:302025-11-30T00:40:33+5:30
शनिवारी (29 नोव्हेंबर 2025) भोपाळमधील एका कार्यक्रमात बोलताना, "जेव्हा-जेव्हा अन्याय होईल, तेव्हा-तेव्हा जिहाद होईल," असे विधान मदनी यांनी केले होते.
"जब-जब जुल्म, तब-तब जिहाद", महमूद मदानी यांच्या वादग्रस्त विधानावर भाजप म्हणाला 'व्हाईट कॉलर दहशतवाद'; काँग्रेसचीही प्रतिक्रिया
जमीयत उलमा-ए-हिंदचे (Jamiat Ulema-e-Hind) प्रमुख मौलाना महमूद मदनी यांनी 'जिहाद' (Jihad) आणि 'तीन तलाक' (Triple Talaq) संदर्भात केलेल्या वादग्रस्त वक्तव्यांवरून देशभरातील राजकारण तापले आहे. शनिवारी (29 नोव्हेंबर 2025) भोपाळमधील एका कार्यक्रमात बोलताना, "जेव्हा-जेव्हा अन्याय होईल, तेव्हा-तेव्हा जिहाद होईल," असे विधान मदनी यांनी केले होते. याचवेळी त्यांनी सर्वोच्च न्यायालयावरही (Supreme Court) टीका केली. मदनी यांच्या या वक्तव्यानंतर भाजपपासून ते काँग्रेस, शिवसेना आणि जेडीयूनेही त्यांच्यावर जोरदार टीका केली आहे.
या 'व्हाइट कॉलर दहशतवादा'च्या... -
भाजप नेते आणि माजी केंद्रीय मंत्री मुख्तार अब्बास नक्वी यांनी मदनी यांच्यावर समाजात जातीय दंगल भडकावण्याच्या उद्देशाने, असे विधान केल्याचा आरोप केला. ते म्हणाले, "या व्हाइट कॉलर दहशतवादाच्या म्होरक्यांच्या कटापासून आपण सावध राहायला हवे. हे लोक मानवता, देश किंवा कोणत्याही धर्माचे हितचिंतक नाहीत. त्यांचे हे विधान देश आणि देशाच्या सन्मानाप्रती त्यांची विकृत मानसिकता दर्शवते." तसेच, भीती आणि संभ्रम आता उघड होत आहे. त्यांची सांप्रदायिक कट-कारस्थानाची विचारसरणी समाजात विभाजन आणि संघर्ष निर्माण करण्याच्या उद्देशाने आहे, असेही नक्वी म्हणाले.
चुकीच्या इस्लामचा उपदेश देणे थांबवा : काँग्रेसची प्रतिक्रिया -
काँग्रेस नेत्या शमा मोहम्मद यांनी मदनींना थेट प्रश्न केला आहे, "तीन तलाकवर सर्वोच्च न्यायालयाच्या निर्णयामध्ये काय चुकीचे आहे? ते तर कुराण शरीफमध्येही नाही. कृपया आपल्या अनुयायांना चुकीच्या इस्लामचा उपदेश देणे थांबवा. हे हराम आहे."
जेडीयू नेते नीरज कुमार यांनी 'वंदे मातरम' आणि राष्ट्रगीतावर कोणाचीही असहमती असू शकत नाही, असे स्पष्ट केले. ते म्हणाले, हा देश सर्वांचा आहे. सर्वांनीच लोकशाही टिकवण्यासाठी आणि स्वतंत्र्य मिळवण्यासाठी आपली भूमिका पार पाडली आहे. या देशाच्या लोकांनी शैक्षणिक संस्था आणि समाजाच्या उभारणीत महत्त्वपूर्ण भूमिका बजावली आहे. त्यामुळे राष्ट्रध्वजासमोर नतमस्तक होणे हे हिंदुस्थानी समाजाचे लक्षण आहे.
शिवसेना नेत्या शाइना एनसी यांनीही मदनी यांच्यावर निशाणा साधला. त्या म्हणाल्या, "सुप्रीम कोर्टने मुस्लिम महिलांच्या सन्मानासाठी तीन तलाकवर बाजू मांडली, तर तो निर्णय प्रतिगामी कसा? आपण मुस्लिम समाजाला का भडकावत आहात? अशा ठेकेदारांनी विचारपूर्वक बोलून लोकांना भ्रमित करू नये."