माजी केंद्रीय मंत्री आणि काँग्रेसच्या बड्या नेत्याचे निधन; ८९ व्या वर्षी घेतला अखेरचा श्वास!

KP Unnikrishnan Passes Away: प्रदीर्घ काळ संसदेत प्रतिनिधित्व करणारे ज्येष्ठ काँग्रेस नेते आणि माजी केंद्रीय मंत्री के.पी. उन्नीकृष्णन यांचे मंगळवारी (३ मार्च २०२६) पहाटे निधन झाले.

प्रदीर्घ काळ संसदेत प्रतिनिधित्व करणारे ज्येष्ठ काँग्रेस नेते आणि माजी केंद्रीय मंत्री के.पी. उन्नीकृष्णन यांचे मंगळवारी (३ मार्च २०२६) पहाटे निधन झाले. वयाच्या ८९ व्या वर्षी कोझिकोड येथील एका खासगी रुग्णालयात त्यांनी अखेरचा श्वास घेतला. गेल्या काही दिवसांपासून ते वयोमानाशी संबंधित आजारांनी त्रस्त होते. त्यांच्या पश्चात पत्नी अमृता आणि दोन मुली असा परिवार आहे.

Kerala | Former Union Minister and senior Congress leader K.P. Unnikrishnan passed away at a private hospital in Kozhikode today

Kerala Chief Minister Pinarayi Vijayan has expressed deep condolences on the passing of former Union Minister KP Unnikrishnan

(file pic of KP… pic.twitter.com/SLulvJC9sI

— ANI (@ANI) March 3, 2026

के.पी. उन्नीकृष्णन यांच्या नावावर केरळच्या राजकीय इतिहासात एक अनोखा विक्रम नोंदवला गेला आहे. कोझिकोडमधील वडकारा या एकाच लोकसभा मतदारसंघाचे त्यांनी सलग २५ वर्षे (१९७१ ते १९९६) प्रतिनिधित्व केले. या काळात त्यांनी तीन वेगवेगळ्या राजकीय पक्षांचे (काँग्रेस, काँग्रेस-यू आणि काँग्रेस-एस) प्रतिनिधित्व केले असले तरी, जनतेने त्यांच्यावर सदैव विश्वास दाखवला. दरम्यान, १९७१ मध्ये त्यांनी पहिल्यांदा काँग्रेसच्या तिकिटावर संसदेत प्रवेश केला. त्यानंतर १९७७, १९८०, १९८४, १९८९ आणि १९९१ अशा सलग निवडणुकांमध्ये त्यांनी विजय मिळवला. १९९५ मध्ये ते पुन्हा मूळ काँग्रेस पक्षात परतले.

१९८९ ते १९९० या काळात त्यांनी तत्कालीन पंतप्रधान व्ही.पी. सिंग यांच्या मंत्रिमंडळात दूरसंचार, नौवहन आणि भूपृष्ठ वाहतूक मंत्री म्हणून कार्यभार सांभाळला. त्यांच्या कार्यकाळातील सर्वात मोठी कामगिरी म्हणजे आखाती युद्धादरम्यान त्यांनी कुवेतमधून १.५ लाखांहून अधिक भारतीयांना सुखरूप मायदेशात आणले होते. या मोहिमेत त्यांनी वैयक्तिक धोका पत्करून तत्कालीन इराकी अध्यक्ष सद्दाम हुसेन यांची भेट घेतली होती. 

२० सप्टेंबर १९३६ रोजी एका स्वातंत्र्यसैनिकाच्या कुटुंबात जन्मलेले उन्नीकृष्णन लहानपणापासूनच समाजवादी विचारांचे समर्थक होते. इंदिरा गांधींच्या सुरुवातीच्या काळात ते त्यांचे कट्टर समर्थक मानले जात. मात्र, आणीबाणीनंतर आणि संजय गांधींशी झालेल्या मतभेदांमुळे त्यांनी वेगळी वाट निवडली. अभ्यासू वक्ता आणि निष्कलंक चारित्र्य असलेले नेते म्हणून त्यांची ख्याती होती.