Accident: अग्निशामक दलाच्या गाडीने सहा जणांना चिरडले, बाप-लेकासह तिघे जागीच ठार, लेक वाचली

Ujjain Accident: आग विझवण्यासाठी जात असलेल्या एका अग्निशामक दलाच्या गाडीने सहा जणांना चिरडले. यात दोन वर्षाच्या मुलासह त्याच्या बापाचा जागीच मृत्यू झाला. 

Accident News: आग लागल्याची माहिती मिळाल्यानंतर घटनास्थळाकडे निघालेल्या एका अग्निशामक दलाच्या गाडीने सहा जणांना चिरडल्याची घटना घडली आहे. 12 जून रोजी दुपारी हा अपघात झाला. मध्य प्रदेशातील उज्जैनमधील बडनगरमध्ये झालेल्या या भीषण अपघातात बापलेकासह तिघांचा जागीच मृत्यू झाला. तर तिघे गंभीर जखमी झाले आहेत. 

'लोकमत'चं WhatsApp चॅनल फॉलो करा!

बडनगर महापालिकेच्या अग्निशामक दलाच्या कार्यालयात आग लागल्याचा माहिती कॉल करून देण्यात आली. बडनगर महामार्गावरील बरगुंडसरी रोडवर ही आग लागली होती. माहिती मिळताच अग्निशामक दलाचे वाहन त्या दिशेने निघाले होते. 

दुचाकीला धडक, गाडी उलटली अन् पाच जण चिरडले

अग्निशामक दलाची गाडी वेगाने घटनास्थळाकडे जात होती. त्याचवेळी रस्त्यात अचानक दुचाकी आली. त्याला अग्निशामक दलाची गाडी धडकली आणि उलटली. त्यानंतर गाडी घासत दूरपर्यंत गेली. यात पाच जण गाडीखाली चिरडले गेले. 

दोन वर्षाचा मुलगा आणि बापाचा मृत्यू, लेक वाचली

अग्निशामक दलाच्या गाडीने चिरडल्याने एका दोन वर्षाच्या मुलासह बाप जागीच ठार झाला. या अपघातात तिघांचा जागीच मृत्यू झाला, तर तिघे गंभीर जखमी झाले आहेत. आवेश (वय २) त्याचे वडील जितेंद्र सिंह (वय ५०), सुजल भुरालाल (वय १६, रा. पीरझालर) यांचा मृत्यू झाला. जितेंद्र सिंह यांची मुलगी तनिषा (वय ३) ही या अपघातात जखमी झाली आहे. 

वाचा >>दोन मुलांची आई १७ वर्षांच्या तरुणाच्या प्रेमात पडली, वर्ष झालं पिच्छा सोडेना, अखेर तरुणाने 'असा' शिकवला धडा!

संतोष आणि उजाला अशी इतर दोन जखमींची नावे आहेत. त्यांच्यावर बडनगर येथील रुग्णालयात उपचार सुरू आहेत. या अपघाताप्रकरणी अग्निशामक दलाच्या वाहनाचा चालक सतीश सोळंकी याला अटक करण्यात आली आहे.