"हा फालतूपणा बघू नको"; राजा रघुवंशीचे रील्स पाहणाऱ्या तरुणीवर बसमध्ये ओरडली होती सोनम

राजा रघुवंशी हत्या प्रकरणात प्रत्यक्षदर्शी उजाला यादवने सोनमसोबत बस प्रवास केल्याची माहिती दिली.

Raja Raghuvanshi Murder Case: इंदौरच्या राजा रघुवंशी आणि सोनम रघुवंशीच्या प्रकरणाने देशभरात खळबळ उडवली आहे. सोनम रघुवंशीने मेघालयात हनिमून दरम्यान तिचा प्रियकर राज कुशवाह आणि त्याच्या मित्रांच्या मदतीने पती राजाची हत्या केली. ज्या प्रकार सोनमने संपूर्ण कट रचून पतीला संपवले ते पाहून अनेकांना धक्का बसला आहे. सध्या सोनम, तिचा प्रियकर राज आणि इतर मेघालय पोलिसांच्या ताब्यात आहेत. अशातच गाझीपूरमधल्या उजाला यादव नावाच्या तरुणीने आपण सोनमसोबत प्रवास केला होता असा खुलासा केला. या प्रवासादरम्यान सोनम विचित्रपणे वागत होती असं उजाला यादवने म्हटलं.

राजा रघुवंशी हत्या प्रकरणात गाझीपूरच्या उजाला यादवने मोठा खुलासा केला. राजा रघुवंशी हत्याकांडातील आरोपी पत्नी सोनम रघुवंशी ८ जूनच्या रात्री वाराणसी कॅन्ट स्टेशनवर होती, असा दावा उजाला यादवने केला. त्यावेळी उजालाला सोनमची पार्श्वभूमी किंवा राजा हत्या प्रकरणाशी तिचा कथित संबंध याबद्दल काहीच माहिती नव्हती. प्रवासादरम्यान दोघांमध्ये सामान्य बोलणं झालं ज्यामध्ये सोनमने गोरखपूरच्या माहिती मागितली, असं उजालाने माध्यमांशी बोलताना सांगितले.

उजालाच्या म्हणण्यानुसार, ८ जून रोजी ती वाराणसी कॅन्ट स्टेशनवर ट्रेनमधून उतरली तेव्हा अचानक एक तरुणी तिच्या जवळ आली आणि गोरखपूरला जाणाऱ्या बसबद्दल विचारू लागली. उजालाने तरुणीला सांगितले की येथून १०० मीटर अंतरावर एक बस स्टँड आहे तिथून तुला गोरखपूरला जाण्यासाठी बस मिळेल. उजालालाही घरी यायचे होते. म्हणून ती गाजीपूरमार्गे गोरखपूरला जाणाऱ्या कॅन्ट रोडवेजच्या बसमध्ये चढली. १० मिनिटांनी स्टेशनवर भेटलेली तरुणीही बसमध्ये आली आणि दुसऱ्या सीटवर बसली. यादरम्यान ती सारखी गोरखपूरला पोहोचण्यासाठी किती वेळ लागेल असे विचारत होती. ती तरुणी वारंवार बसमधील लोकांकडून फोन मागत होती पण कोणीही तिला फोन दिला नाही. त्यानंतर ती सैदपूर येथे उतरली. ती तरुणी बसमध्ये आली तेव्हा तिच्यासोबत दोन मुलेही होती. रात्री ११ वाजता बस सुरू झाली तेव्हा दोघेही खाली उतरले, असं उजाला यादवने सांगितले.

उजालाने सांगितले की ती राजा रघुवंशीच्या हत्येशी संबंधित रील्स पाहत होती. तेव्हा सोनम तिच्यावर रागावली आणि म्हणाली की काय फालतू व्हिडिओ पाहतेय, ते पाहू नको. तिने आक्षेप घेतल्यानंतर मी ते बंद केले. यावेळी सोनमने आजूबाजूच्या लोकांकडून मोबाईल फोनही मागितले. पण कोणीही तिला फोन दिला नाही. सोनमने उजालाकडेही मोबाईल फोन मागितला होता. त्यानंतर तिने एक नंबर टाइप केला पण तो डायल केला नाही आणि लगेच डिलीट केला. त्यानंतर तिने मोबाईल परत उजालाला दिला. मला तो प्रकार थोडासा विचित्र वाटला असंही उजालाने म्हटलं. 

दुसऱ्या दिवशी सकाळी जेव्हा उजालाने सोनमला टीव्हीवर पाहिले तेव्हा तिच्या लक्षात आले की हीच तरुणी आपल्याला रात्री भेटली होती. उजालाने पोलिसांनाही याबद्दल माहिती दिली होती. तिने सोशल मीडियावर व्हायरल झालेल्या राजा आणि सोनमच्या लग्नाच्या कार्डच्या फोटोवरून नंबर घेतला आणि राजाच्या भावाला याची माहिती दिली.