Udayan Raje bhosale in Delhi to join BJP, Special Chopper ride with Chief Minister devendra fadanvis | उदयनराजे दिल्ली दरबारी, मुख्यमंत्र्यांसोबत स्पेशल चॉपरची सवारी 
उदयनराजे दिल्ली दरबारी, मुख्यमंत्र्यांसोबत स्पेशल चॉपरची सवारी 

मुबई - राष्ट्रवादी काँग्रेसचे नेते आणि साताऱ्याचे खासदार उदयनराजे भोसले यांनी भाजपात प्रवेश करत असल्याची घोषणा केली. आपल्या फेसबुक आणि ट्विटर अकाऊंटवरुन उदयनराजेंनी संदेश लिहून उद्या म्हणजेच 14 सप्टेंबर रोजी पंतप्रधान नरेंद्र मोदींच्या उपस्थितीत दिल्लीमध्ये हा प्रवेश सोहळा होणार असल्याचेही सांगण्यात आले आहे. विशेष म्हणजे मुख्यमंत्री देवेंद्र फडणवीस हे आज सायंकाळी विशेष हेलिकॉप्टरने उदयनराजेंना घेऊन दिल्लीला जाणार आहेत. 

आजपर्यंत आपण सर्वांनी दिलेल्या प्रेमाच्या व आशीर्वादाच्या जोरावर समाजकार्य करण्याची प्रेरणा मिळत राहिली. आपले हेच प्रेम व आशीर्वाद अविरत माझ्या पाठिशी राहिल, हीच अपेक्षा, असे म्हणत उदयनराजेंनी भाजपा प्रवेशाची घोषणा केली. आता, लढाई रयतेच्या विकासासाठी फक्त अशा आशयाचे बॅनर लावून गृहमंत्री अमित शहा, केंद्रीयंमत्री नितीन गडकरी, मुख्यमंत्री देवेंद्र फडणवीस आणि महसूलमंत्री चंद्रकांत पाटील यांच्या उपस्थितीत आपला प्रवेश होणार असल्याचेही उदयनराजेंनी सांगितले. 

खासदार उदयनराजे यांनी गुरुवारी सकाळी 10 वाजता पुण्यातील शरद पवार यांच्या निवासस्थानी जाऊन त्यांची भेट घेतली होती. या भेटीत चर्चा झाल्यानंतर राजेंनी आज आपली भूमिका जाहीर केली आहे. पवार यांच्यासोबतच्या भेटीवेळी विधानपरिषदेचे विरोधी पक्षनेते धनंजय मुंडे आणि शशिकांत शिंदेही उपस्थित होते. या बैठकीनंतर धनंजय मुंडेंनी पत्रकारांशी संवाद साधून उदयनराजेंच्या भाजपा प्रवेशाचे वृत्त नाकारले होते. उदयनराजे आगामी विधानसभा निवडणुकांच्या अनुषंगाने बैठकीला आले होते, असे मुंडेंनी सांगितले होते. मात्र, मुंडेंचा आशावाद फोल ठरला असून उदयनराजे उद्या भाजपात प्रवेश करणार आहेत. 
 
 

English summary :
Nationalist Congress leader and Satara MP Udayan Raje Bhosale announced that he was entering BJP. Udayanrajan has also written a message from his Facebook and Twitter accounts saying that the entry ceremony will be held in Delhi in the presence of Prime Minister Narendra Modi tomorrom ( 14 Sep 2019 ) .


Web Title: Udayan Raje bhosale in Delhi to join BJP, Special Chopper ride with Chief Minister devendra fadanvis
Get Latest Marathi News & Live Marathi News Headlines from Politics, Sports, Entertainment, Business and local news from all cities of Maharashtra.