गंगेत सुटकेस फेकण्यासाठी आल्या मायलेकी; बॅग उघडल्यावर सापडला महिलेचा मृतदेह, स्थानिकांनी पकडलं

कोलकातामध्ये नदीवर मृतदेहाची विल्हेवाट लावण्यासाठी आलेल्या दोन महिलांना पोलिसांनी अटक केली.

Kolkata Crime: गेल्या काही दिवसांमध्ये सुटकेसमध्ये मृतदेह सापडण्याचे प्रकार वाढल्याने नागरिकही सतर्क झाले आहेत. याच सतर्कतेमुळे पश्चिम बंगालच्या कोलकातामध्ये सुटकेसमधून मृतदेहाची विल्हेवाट लावताना स्थानिकांनी आई आणि मुलीला रंगेहात पकडले आहे. आई आणि मुलगी घेऊन चाललेली सुटकेस बघून सुरुवातीला लोकांना त्यात कपडे किंवा सामान असेल असं लोकांना वाटलं. पण नंतर संशय आल्यानंतर याबाबत विचारलं तेव्हा हा प्रकार उघडकीस आला. महिलांच्या हातातील सुटकेस उघडली असता बॅगेत एका महिलेचा मृतदेह होता.

कोलकाताच्या कुमारतुली काठावर मंगळवारी एक महिला आणि तिची मुलगी जड ट्रॉली बॅग घेऊन आली होती. त्यांच्या चेहऱ्यावर भीती स्पष्टपणे दिसत होती. त्यामुळे लोकांना संशय आला आणि नदीच्या काठावर ट्रॉली बॅग कशासाठी अशी शंका निर्माण झाली. लोकांनी विचारायला सुरुवात केल्यावर घाबरेलेल्या महिलेने त्यात आमचे मेलेलं श्वान आहे असं सांगितले. लोकांना काहीतरी वेगळं प्रकरण असल्याचे वाटताच त्यांनी महिलेला आणि तिच्या मुलीला थांबवून ठेवलं आणि पोलिसांना याची माहिती दिली. पोलिसांनी बॅग उघडून पाहिली असता त्यामध्ये एका महिलेचा शिरच्छेद केलेला मृतदेह आढळून आला. पोलिसांनी त्या सुटकेससह दोन्ही मायलेकीला पोलीस ठाण्यात आणलं.

फाल्गुनी घोष आणि तिची आई आरती घोष असे अटक केलेल्या दोन्ही महिलांची नावे आहेत. सुमिता घोष (५५) असे मृत महिलेचे नाव आहे. सुमिता घोष या फाल्गुनी घोषच्या सासऱ्याची बहीण असल्याचे समर आलं आहे. फाल्गुनी आणि आरती घोष या मंगळवारी सकाळी आठ वाजता उत्तर कोलकाता येथील कुमारतुली इथल्या गंगेच्या काठावर निळ्या रंगाच्या ट्रॉली बॅगसह आल्या होत्या. त्यांच्या हालचाली संशयास्पद वाटल्याने लोकांनी त्यांना बॅग उघडून दाखवायला सांगितली. सुरुवातीला बऱ्याच वेळा नकार दिल्यानंतर बॅगेत श्वानाचा मृतदेह असल्याचे आरती घोष यांनी सांगितले.

त्यानंतर पोलिसांनी येऊन बॅग खोलली तेव्हा एका महिलेचा शिरच्छेद केलेला मृतदेह आढळून आला. पोलिसांनी तात्काळ दोघींनाही अटक करुन पोलीस ठाण्यात आणलं. चौकशीदरम्यान फाल्गुनीने मृत महिला माझ्या सासऱ्यांची बहीण सुमिता घोष असल्याचे सांगितले. आसामच्या सुमिता घोष या अनेक वर्षांपासून पतीपासून वेगळ्या राहत होत्या. ११ फेब्रुवारी रोजी त्या कोलकाता येथील त्यांच्या आई वडिलांच्या घरी राहण्यासाठी आल्या होत्या. 

पोलिसांच्या चौकशीत फाल्गुनीसोबत झालेल्या वादात सुमिता यांचा मृत्यू झाला. फाल्गुनीचे तिच्या पतीसोबत संबंध ठीक नसल्याने ती वेगळी राहत होती. सोमवारी संध्याकाळी काही कारणावरुन फाल्गुनी आणि सुमिता यांच्या काही कारणावरुन वाद होऊन हाणामारी झाली. फाल्गुनीने सुमिताला भिंतीवर ढकलले आणि ती बेशुद्ध झाली. शुद्धीवर आल्यावर त्यांच्यात पुन्हा मारामारी सुरू झाली. यावेळी फाल्गुनीने सुमिताच्या चेहऱ्यावर आणि मानेवर विट मारली ज्यामध्ये त्यांचा मृत्यू झाला. त्यानंतर आरती आणि फाल्गुनीने सुमिताचा मृतदेह ट्रॉली बॅगमध्ये भरुन गंगा नदीत टाकण्याचा प्रयत्न केला पण तो फसला.