तोगडिया यांच्या नातेवाइकासह तिघांची हत्या

भरत तोगडिया यांच्यासह अन्य दोन जणांची अज्ञात मारेकऱ्यांनी शनिवारी रात्री चाकू भोसकून निर्घृण हत्या केली.

सुरत : विश्व हिंदू परिषदेचे नेते प्रवीण तोगडिया यांचे नातेवाईक भरत तोगडिया यांच्यासह अन्य दोन जणांची अज्ञात मारेकऱ्यांनी शनिवारी रात्री चाकू भोसकून निर्घृण हत्या केली. पोलिसांनी दिलेल्या माहितीनुसार सुरतच्या अश्विनीकुमार मार्ग येथे अज्ञात मारेकऱ्यांनी शनिवारी रात्री भरत तोगडियांसह तिघांची हत्या केली. या प्रकरणी रविवारी तीन जणांना पोलिसांनी अटक केली. आणखी चार आरोपींचा शोध घेण्यात येत आहे.
अमरेली जिल्ह्यातील जमिनीच्या सौद्याशी संबंधित खंडणी वसुलीवरून हे तिहेरी हत्याकांड घडल्याचा पोलिसांचा संशय आहे. मृत भरत तोगडिया हे सुरत महानगर पालिकेतील विरोधी पक्ष नेते आणि काँग्रेसचे नेते प्रफुल्ल तोगडिया यांचे भाऊ आहेत. तोगडिया यांच्यासह बाळू हिराणी आणि अशोक पटेल अन्य मृतांची नावे आहेत.या तिहेरी हत्याकांडाने राजकीय वळण घेतले आहे. राजद अध्यक्ष लालूप्रसाद यादव यांनी गुजरातमधील कायदा व सुव्यवस्था परिस्थितीबाबत प्रश्न उपस्थित करीत, हे कोणते राज, असा सवाल केला आहे.