होणाऱ्या १८ वर्षीय सुनेच्या प्रेमात पडला ५५ वर्षीय सासरा, केलं लग्न; आता म्हणतो, "या जन्मात..."

एका ५५ वर्षीय व्यक्ती त्याच्या होणाऱ्या सुनेच्या प्रेमात पडला. मुलाऐवजी सासऱ्यानेच १८ वर्षीय मुलगी पटवली आणि नंतर थेट लग्न केलं आहे.

उत्तर प्रदेशमध्ये जावयासोबत सासू पळून गेल्याची घटना ताजी असतानाच अशीच एक धक्कादायक घटना समोर आली आहे. एका ५५ वर्षीय व्यक्ती त्याच्या होणाऱ्या सुनेच्या प्रेमात पडला. मुलाऐवजी सासऱ्यानेच १८ वर्षीय मुलगी पटवली आणि नंतर थेट लग्न केलं आहे.  एवढंच नाही तर "या जन्मात हिची साथ सोडणार नाही" असं सासऱ्याने सर्वांना ठणकावून सांगितलं आहे. सध्या या लग्नाची सर्वत्र जोरदार चर्चा रंगली आहे. 

रामपूर पोलीस ठाण्याच्या भोट परिसरातील एका गावात ही अजब घटना घडली आहे. गावात राहणाऱ्या  ५५ वर्षीय व्यक्तीच्या मुलाचं लग्न हे वर्षभरापूर्वी अझीमनगर पोलीस स्टेशन परिसरातील एका मुलीशी ठरलं होतं. याच दरम्यान मुलाचे वडील मुलीच्या घरी सतत येत राहिले. हळूहळू या संवादाचं रूपांतर प्रेमात झालं. कोणालाही कल्पना नव्हती की मुलाचे वडील थेट सुनेच्याच प्रेमात पडतील.

८ दिवसांपूर्वी सासरा होणाऱ्या सुनेच्या घरी आला आणि मुलीच्या कुटुंबाला सांगितलं की ते तिला डॉक्टरकडे घेऊन जाऊ इच्छितात कारण ती खूपच कमकुवत आहे. कुटुंबाने यासाठी लगेच होकार दिला, परंतु दोघेही संध्याकाळपर्यंत परतले नाहीत. कुटुंबाने संपर्क साधला तेव्हा सासऱ्याने सांगितलं की, मुलीला रुग्णालयात दाखल करण्यात आलं आहे. त्यानंतर सासऱ्याने उडवाउडवीची उत्तर दिली. 

आठ दिवसांनंतर सासऱ्याने आपल्या मुलाच्या होणाऱ्या बायकोशी म्हणजेच सुनेशी लग्न केलं आणि घरी आले. यानंतर कुटुंबामध्ये मोठा वाद झाला. मुलगा आणि वडिलांमध्ये तसेच नवविवाहित मुलगी आणि तिच्या सासूमध्येही जोरदार भांडण झालं. प्रकरण इतकं वाढलं की हा वाद टोकाला गेला. परिसरातील लोकांनी मध्यस्थी करून कसंतरी हे प्रकरण शांत केलं.