Raja Raghuvanshi Crime Scene Recreation: मेघालयातील राजा रघुवंशी हत्या प्रकरणाच्या तपासाला आता वेग आला आहे. राजा रघुवंशी हत्या प्रकरणाचा घटनाक्रम समजून घेण्यासाठी शिलाँग पोलीस सोहराच्या वेसाडोंग फॉल्समध्ये पोहोचले होते. आरोपींनी राजा कसे संपवले याचा पूर्ण सीन रिक्रिएट करण्यात आला. यावेी फॉरेन्सिक टीम देखील घटनास्थळी उपस्थित होती. सोनम रघुवंशीसह सर्व आरोपींना गुन्ह्याच्या ठिकाणी नेण्यात आले होते. यावेळी पोलिसांनी आरोपी सोनम रघुवंशी आणि इतर तीन आरोपींनी १८ मिनिटांत एवढी मोठी घटना कशी घडवली हे जाणून घेतले.
पोलीस यंत्रणाच्या कडक सुरक्षेत आरोपींना राजा रघुवंशीची हत्या करण्यात आलेल्या ठिकाणी नेण्यात आलं. आरोपींनी राजाचा मृतदेह मेघालयातील इस्ट खासी हिल्स जिल्ह्यातील चेरापुंजी येथे एका खड्ड्यात फेकला होता. संपूर्ण घटनाक्रम एसडीआरएफ आणि पोलिस पथकांच्या उपस्थितीत रिक्रिएट करण्यात आला. सोनमला येथे वेगळ्या वाहनातून आणण्यात आले तर इतर तीन आरोपींना दुसऱ्या वाहनातून आणण्यात आले. हत्येच्या दिवशी राज शिलाँगमध्ये उपस्थित नव्हता, त्यामुळे त्याला घटनेच्या ठिकाणी नेण्यात आले नाही.
शिलाँग पोलिसांनी २३ मे रोजी दुपारी २:१८ वाजता १८ मिनिटांत राजाची हत्या करून त्याचा मृतदेह फेकून दिल्याचा दावा केला होता. आरोपींना घटनास्थळी नेऊन ते कोणत्या मार्गाने वर आले, सगळ्यात आधी हल्ला कोणी केला, राजाची हत्या कशी झाली, मृतदेह कसा उचलला आणि खाली फेकला गेला आणि नंतर तेथून कसे पळून गेले हे समजून घेण्याचा प्रयत्न करण्यात आला. यातून पोलिसांना या घटनेबद्दलच्या अनेक प्रश्नांची उत्तरे मिळू शकतात.
हत्येच्या दिवशी गुन्ह्याच्या ठिकाणी पोहोचल्यानंतर राजाला लघुशंका करण्यासाठी जायचं होतं. तो दरीत लघवी करू लागला. त्याचवेळी सोनम आणि तीन आरोपी तिथे पोहोचले. त्यावेळी सोनम मोठ्याने ओरडून आरोपींना त्याला मारण्यास सांगत होती. त्यानंतर तिन्ही आरोपींनी धारदार शस्त्राने राजावर हल्ला केला. राजाची हत्या केल्यानंतर चौघांनी राजाचा मृतदेह उचलून सेल्फी पॉइंटवरून खाली फेकून दिला. लग्नानंतर राजा आणि सोनम २३ मे रोजी येथून बेपत्ता झाले होते. पोलिसांना २ जून रोजी राजाचा मृतदेह सापडला होता. सोनमने तिचा कथित प्रियकर राज कुशवाह आणि तीन मित्रांसह शिलाँगमध्ये संपूर्ण घटनेचा कट रचला होता.