सावधान! मुलांचे आवडते पदार्थ ठरताहेत जीवघेणे? मोमोज खाऊन झोपलेल्या बहीण-भावाचा मृत्यू

एकाच कुटुंबातील दोन मुलांच्या मृत्यूमुळे परिसरात खळबळ उडाली आहे.

पंजाबच्या तरनतारनमध्ये एकाच कुटुंबातील दोन मुलांच्या मृत्यूमुळे परिसरात खळबळ उडाली आहे. मिळालेल्या माहितीनुसार, सहा आणि नऊ वर्षांच्या बहीण-भावाची तब्येत अचानक बिघडली होती. नातेवाईकांनी त्यांना तातडीने रुग्णालयात नेलं, मात्र उपचारादरम्यान दोन्ही मुलांचा मृत्यू झाला. या घटनेनंतर कुटुंबावर दुःखाचा डोंगर कोसळला असून संपूर्ण परिसरात शोककळा पसरली आहे.

६ वर्षांचा आरव आणि त्याची ९ वर्षांची दानिका यांचा मृत्यू झाला आहे. शनिवारी संध्याकाळपर्यंत सर्व काही ठीक होतं आणि मुलं पूर्णपणे निरोगी होती, मात्र रात्र होताच  परिस्थिती अचानक बदलली. मिळालेल्या माहितीनुसार, मुलांच्या हट्टापायी त्यांचे वडील विशाल यांनी मोमोज आणले होते. दोन्ही मुलांनी रात्री ते खाल्ले. यानंतर साधारण दोन तासांनी, म्हणजेच रात्री १० वाजेच्या सुमारास, दोघांची प्रकृती अचानक खालावली. त्यांना उलट्या होऊ लागल्या, त्यानंतर कुटुंबीयांनी त्यांना तातडीने रुग्णालयात नेलं.

रुग्णालयात डॉक्टरांनी मुलांवर उपचार सुरू केले, मात्र त्यांची प्रकृती सातत्याने बिघडत गेली. डॉक्टरांच्या सर्व प्रयत्नांनंतरही दोन्ही मुलांची जीव वाचवता आला नाही. केवळ १० दिवसांपूर्वीच आरवचा वाढदिवस साजरा करण्यात आला होता, त्यामुळे घरात आनंदाचं वातावरण होतं. आता अचानक दोन्ही मुलांच्या मृत्यूमुळे पालकांचा आक्रोश काळीज पिळवटून टाकणारा आहे.

पोलिसांनी या प्रकरणाचे गांभीर्य ओळखून तपास सुरू केला आहे. मुलांच्या मृत्यूचे नेमकं कारण शोधण्यासाठी सर्व बाजूंनी तपास केला जात असल्याचं अधिकाऱ्यांनी सांगितलं. डॉक्टरांचा रिपोर्ट आणि शवविच्छेदन झाल्यानंतरच मृत्यूचं नेमकं कारण स्पष्ट होईल. तपास पूर्ण झाल्यानंतरच पुढील कारवाई केली जाईल असं पोलिसांनी स्पष्ट केलं आहे.