पंजाबमध्ये पाकिस्तानी गुप्तहेराला अटक; ऑपरेशन सिंदूरची माहिती आयएसआय एजंटना पाठवली

पंजाब पोलिसांनी आयएसआयसाठी हेरगिरी करणाऱ्या एकाला तरणतारन येथून अटक केली आहे.

Punjab Spy Arrested: पहलगाम हल्ल्यानंतर पाकिस्तानसाठी हेरगिरी करणाऱ्यांविरुद्ध देशभरात तपास यंत्रणा अधिक सतर्क झाल्या आहेत. राष्ट्रीय तपास संस्था (एनआयए) आणि दहशतवादविरोधी पथकांकडून देशभरात कारवाई सुरु असून पाकिस्तानसाठी हेरगिरी करणाऱ्यांवर कारवाई करण्यात आली आहे. यामध्ये ठाण्यातील अभियंता रवी वर्मा, हरियाणाच्या युट्यूबर ज्योती मल्होत्रासह अनेकांना ताब्यात घेण्यात आलं आहे. आता पंजाबमध्ये मोठी कारवाई करण्यात आली आहे. पाकिस्तानला भारताच्या ऑपरेशन सिंदूरची माहिती देणाऱ्या एका गुप्तहेराला अटक करण्यात आली आहे.

पहलगाम हल्ल्यानंतर भारताने प्रत्युत्तर देत ऑपरेशन सिंदूर सुरु केलं आहे. ऑपरेशन सिंदूर राबवून भारताने पाकिस्तानातील दहशतवादी तळ उद्धवस्त केले. त्यानंतर भारतातील संवेदनशील माहिती पाकिस्तानला पुरवणाऱ्या गुप्तहेरांविरोधात तपास यंत्रणांकडून मोहिम सुरु करण्यात आली. या कारवाईमध्ये ताब्यात घेतलेल्या अनेकांनी पाकिस्तानला मोठ्या प्रमाणात महत्त्वाची माहिती पुरवल्याचे उघड झालं. अशातच आता ऑपरेश सिंदूरची माहिती पाकिस्तानातील आयएसआय एजंटना पुरवल्याचे समोर आलं आहे.

पंजाब पोलिसांच्या काउंटर इंटेलिजेंस युनिट आणि तरनतारन पोलिसांच्या संयुक्त कारवाईत ऑपरेशन सिंदूरची माहिती पाकिस्तानी आयएसआय एजंटना पाठवणाऱ्या एका गुप्तहेराला अटक करण्यात आली आहे. आरोपीचे नाव गगनदीप सिंग असून तो मोहल्ला रोडुपूर गली नजर सिंग वली, तरनतारन येथील रहिवासी आहे. गगनदीपवर पाकिस्तानची गुप्तचर संस्था आयएसआय आणि खलिस्तानी समर्थक गोपाल सिंग चावला यांच्या संपर्कात राहून लष्कराशी संबंधित संवेदनशील माहिती शेअर केल्याचा आरोप आहे.

Acting swiftly on information received from Counter-Intelligence-Punjab, @TarnTaranPolice, in a joint operation arrests Gagandeep Singh @ Gagan, a resident of Mohalla Rodupur, Gali Nazar Singh Wali, #TarnTaran.

Arrested accused had been in contact with the #Pakistan#ISI and… pic.twitter.com/JIuLVToIMk

— DGP Punjab Police (@DGPPunjabPolice) June 3, 2025

पोलिसांच्या प्राथमिक तपासात गगनदीप सिंग हा भारतीय सैन्याच्या कारवाया आणि मोक्याच्या ठिकाणांशी संबंधित गोपनीय माहिती पाकिस्तानला पाठवत होता. ऑपरेशन सिंदूर दरम्यान तो ही माहिती शेअर करत होता. गगनदीप पाच वर्षांपासून पाकिस्तानस्थित खलिस्तानी दहशतवादी गोपाल सिंग चावला यांच्या संपर्कात होता. या माध्यमातून त्याची ओळख एका पाकिस्तानी आयएसआय ऑपरेटिव्हशी (पीआयओ) झाली. गगनदीपला ही माहिती पुरवण्यासाठी पैसेही दिले जात होते. हा पैसा पाकिस्तानी एजंटकडून थेट गगनदीपकडे पोहोचवण्यात येत होता.

अटक केल्यानंतर गगनदीपकडून एक मोबाईल जप्त करण्यात आला आहे ज्याद्वारे तो आयएसआय एजंटना संवेदनशील माहिती पाठवत होता. त्याच्या फोनमधून २० हून अधिक संशयित आयएसआय नंबरची माहिती मिळाली आहे. या नेटवर्कच्या मुळापर्यंत जाण्यासाठी आणि गगनदीपच्या अन्य सहकाऱ्यांना शोधण्यासाठी तपास यंत्रणांकडून तांत्रिक आणि आर्थिक चौकशी सुरू आहे.