हवेत असतानाच विमानाचं इंजिन फेल? दिल्ली विमानतळावर आणीबाणी, पण वैमानिकानं दाखवलं प्रसंगावधान, वाचले १६१ प्रवाशांचे प्राण

IGI Airport Full Emergency: वैमानिकाने दाखवलेलं प्रसंगावधान आणि विमानतळ प्रशासनाने दाखवलेल्या तत्परतेमुळे दिल्लीमधील इंदिरा गांधी आंतरराष्ट्रीय विमानतळावर शनिवारी सकाळी मोठी दुर्घटना टळली.

वैमानिकाने दाखवलेलं प्रसंगावधान आणि विमानतळ प्रशासनाने दाखवलेल्या तत्परतेमुळे दिल्लीमधील इंदिरा गांधी आंतरराष्ट्रीय विमानतळावर शनिवारी सकाळी मोठी दुर्घटना टळली. विशाखापट्टणम येथून दिल्लीला येत असलेल्या इंडिगोच्या विमानात तांत्रिक बिघाड झाल्याची माहिती मिळाली. विमानाचं इंजिन फेल झालं असण्याची शक्यता निर्माण झाल्याने इंदिरा गांधी आंतरराष्ट्रीय विमानतळावर फुल एमरजन्सी घोषित करण्यात आली. विमानातून प्रवास करत असलेल्या १६१ प्रवाशांचा जीव टांगणीला लागला होता. अशा परिस्थितीत वैमानिकानं दाखवलेलं प्रसंगावधान आणि विमानतळ प्रशासनाच्या तत्परतेमुळे पुढची दुर्घटना टळली.

आपातकालीन प्रोटोकॉलदरम्यान, इंडिगोच्या विमानाने सकाळी १० वाजून ५४ मिनिटांनी इंदिरा गांधी आंतरराष्ट्रीय विमानतळाच्या २८ क्रमांकाच्या रनवेवर सुखरूपपणे लँडिंग केलं. विमानाने लँडिंग केलं तेव्हा कुठल्याही प्रकारच्या दुर्घटनेचा सामना करण्यासाठी विमानतळावर अग्निशमन दलाची वाहने आणि रुग्णवाहिका तैनात करण्यात आल्या होत्या.

मिळालेल्या माहितीनुसार या विमानामध्ये एकूण १६१ प्रवासी प्रवास करत होते. विमान उतरल्यानंतर सर्व प्रवाशांना विमानातून सुखरूपपणे बाहेर काढण्यात आले. प्रवाशांची तपासणी करण्यात आल्यानंतर त्यांना पुढच्या प्रवासासाठी रवाना करण्यात आले. इंडिगो प्रशासनाकडून आता या तांत्रिक बिघाडाची सखोल चौकशी केली जात आहे.