"मी स्वत: प्रकरणाचा अभ्यास केला, पूर्णपणे बनावट केस", जैन यांच्या अटकेवर केजरीवाल सविस्तर बोलले!

दिल्ली सरकारमधील आरोग्यमंत्री सत्येंद्रे जैन यांना सक्तवसुली संचालनालयाकडून (ईडी) अटक झाल्याच्या मुद्द्यावर मुख्यमंत्री अरविंद केजरीवाल यांनी थेट केंद्र सरकारवर निशाणा साधला आहे.

नवी दिल्ली-

दिल्ली सरकारमधील आरोग्यमंत्री सत्येंद्रे जैन यांना सक्तवसुली संचालनालयाकडून (ईडी) अटक झाल्याच्या मुद्द्यावर मुख्यमंत्री अरविंद केजरीवाल यांनी थेट केंद्र सरकारवर निशाणा साधला आहे. सत्येंद्र जैन यांच्याविरोधातील प्रकरण पूर्णपणे फेक असून राजकीय हेतूनं प्रेरित असल्याचं म्हटलं आहे. आम आदमी पक्ष प्रमाणिक पक्ष असून जर या प्रकरणात एक टक्का जरी तथ्य असतं तर मी स्वत: त्यांच्यावर कारवाई केली असती, असं केजरीवाल म्हणाले. 

आपल्या पक्षात अजिबात भ्रष्टाचार खपवून घेतला जात नसल्याचं सांगत केंद्रीय यंत्रणा अनेक प्रकरणांमध्ये राजकीय हेतूनं प्रेरित काम करत असल्याचा आरोप केजरीवालांनी यावेळी केला. पंजाबचे आरोग्य मंत्री विजय सिंगला यांना नुकतेच मुख्यमंत्री भगवंत मान यांनी भ्रष्टाचाराच्या आरोपावरून राज्य मंत्रिमंडळातून काढून टाकल्याचा संदर्भ देत दिल्लीचे मुख्यमंत्री म्हणाले की त्यांच्या पक्षाच्या सरकारनं पुढाकार घेतला आणि मंत्र्यांना अटक केली. खरंतर पुराव्याकडे दुर्लक्ष करू शकलो असतो पण तसं केलं नाही. 

मोठी बातमी! केजरीवाल सरकारला धक्का, आरोग्यमंत्री सत्येंद्र जैन यांना 'ईडी'कडून अटक

"तुम्ही पंजाबमध्ये एका राज्यमंत्र्याचे ऑडिओ रेकॉर्डिंग ऐकले होते ज्याची कोणत्याही तपास संस्थेला किंवा विरोधी पक्षाला कल्पना नव्हती. आम्ही हवं असतं तर ते दडपून टाकू शकलो असतो, पण आम्ही स्वतःहून त्याच्यावर कारवाई सुरू केली आणि त्याला अटक केली", असं केजरीवाल म्हणाले. 

"मी स्वत: सत्येंद्र जैन यांच्यावरील खटल्याचा अभ्यास केला आहे. ते प्रकरण पूर्णपणे फेक आहे आणि त्यांना राजकीय कारणांसाठी हेतुपुरस्सर गोवण्यात आलं आहे. आमचा न्यायव्यवस्थेवर विश्वास आहे. जैन हे सत्याच्या मार्गावर आहेत आणि ते स्वच्छ बाहेर येतील", असं केजरीवाल म्हणाले. 

जैन यांना ईडीकडून अटक
सत्येंद्र जैन यांना मनी लाँड्रींग प्रकरणात ईडीकडून काल अटक करण्यात आली आहे. हवाला केस प्रकरणी सत्येंद्र जैन यांची ईडीकडून याआधीपासूनच चौकशी सुरू होती. ईडीनं ५ एप्रिल रोजी कारवाई करत त्यांची ४.८१ कोटी रुपयांची संपत्ती देखील जप्त केली होती. आता थेट अटकेची कारवाई झाल्यानं केजरीवाल सरकारसमोर मोठा पेच निर्माण झाला आहे. 

नेमकं प्रकरण काय?
सत्येंद्र जैन यांनी 2015-16 मध्ये तीन खाजगी कंपन्यांच्या माध्यमातून पैसा मिळविल्याचा आरोप आहे. प्रायाज इन्फो सॉल्यूशन्स प्रायव्हेट लिमिटेड, अकिनन डेव्हलपर्स प्रायव्हेट लिमिटेड आणि मनगलियातन प्रोजक्ट्स प्रायव्हेट लिमिटेड या कंपन्यांच्या शेअरमधून कथितरित्या कोट्यवधी रुपयांची बेहिशेबी मालमत्ता मिळविल्याचा त्यांच्यावर आरोप आहे. तसेच, सत्येंद्र जैन यांच्या कुटुंबीयांचे सुद्धा या कंपनांमधून शेअर आहेत.