३० हजारांची लाच, रंगेहात पकडलेल्या अधिकाऱ्याच्या घरात सापडला नोटांचा डोंगर, मोजून मोजून मशीनही थकल्या

Odisha Bribe Case: भ्रष्ट सरकारी अधिकाऱ्यांकडे बेहिशोबी मालमत्ता, दागदागिने सापडणं आता आपल्यासाठी नवं राहिलेलं नाही. यादरम्यान, ओदिशामधील दक्षता विभागाने खाण विभागातील एका वरिष्ठ अधिकाऱ्याला लाचखोरीच्या एका प्रकरणात रंगेहात पकडलं आहे.

भ्रष्ट सरकारी अधिकाऱ्यांकडे बेहिशोबी मालमत्ता, दागदागिने सापडणं आता आपल्यासाठी नवं राहिलेलं नाही. यादरम्यान, ओदिशामधील दक्षता विभागाने खाण विभागातील एका वरिष्ठ अधिकाऱ्याला लाचखोरीच्या एका प्रकरणात रंगेहात पकडलं आहे. तसेच या अधिकाऱ्याच्या फ्लॅटमधून चार कोटींपेक्षा अधिक रुपयांची रोख रक्कम जप्त केली आहे. अशा कारवाईत झालेली ही राज्याच्या इतिहासातील सर्वात मोठ्या रोख रकमेची जप्ती आहे, असेही दक्षता विभागाने सांगितले आहे.

याबाबत मिळालेल्या अधिक माहितीनुसार कटक सर्कलमधीली खाणींचे उप संचालक म्हणून तैनात असलेले देवव्रत मोहंती यांना ओदिशा दक्षता विभागाने आधी ३० हजार रुपयांची लाच स्वीकारताना पकडले. त्यांच्यावर एक परवानाधारी कोळसा व्यापाऱ्याकडून त्याच्याकडील कोळसा डेपो व्यवस्थित चालवण्यासाठी आणि कोळशाच्या वाहतुकीला परवानगी देण्याच्या बदल्यात पैशांची मागणी केल्याचा आरोप आहे. ही कारवाई करण्यासाठी मंगळवारी दक्षता विभागाने सापळा रचला आणि मोहंती याला ३० हजार रुपयांची लाच घेताना पकडले. आरोपीकडून लाचेची संपूर्ण रक्कम जप्त करण्यात आली आहे.

मोहंती याला अटक करण्यात आल्यानंतर सतर्कता अधिकाऱ्यांनी तीन ठिकाणी एकत्रितरीत्या धाड टाकली. त्यात मोहंती याचा भुवनेश्वर येथील फ्लॅट, भद्रक जिल्ह्यातील मथासाही येथील वडिलोपार्जित घर आणि कटक येथील कार्यालयातील दालन याचा समावेश होता. या धाडीदरम्यान, भुवनेश्वर येथील पाटियामधील श्रीविहार नेचर क्रेस्ट अपार्टमेंटमधील त्यांच्या फ्लॅटमधून ४ कोटी रुपयांहून अधिकची रोख  रक्कम जप्त करण्यात आली आहे.

STORY | Record Rs 4 crore in cash seized from flat of Odisha officer arrested in corruption case

Stacks of notes packed in trolley bags were allegedly recovered from the house of an Odisha Mines Department officer, who was arrested in a corruption case, officials said on… https://t.co/m7zTWTa72D

— Press Trust of India (@PTI_News) February 25, 2026

ही रक्कम ट्रॉली बॅग आणि कपाटांमध्ये लपवून ठेवण्यात आली होती. जप्त करण्यात आलेल्या रकमेची मोजणी सुरू असून, मोजणी पूर्ण झाल्यानंतर जप्त केलेल्या रकमेचा अचूक आकडा कळणार आहे. तसेच जप्त करण्यात आलेली रक्कम ही राज्याच्या सतर्कता विभागाने कारवाईत आतापर्यंत जप्त केलेली सर्वात मोठी रक्कम असल्याचे सांगण्यात येत आहे. याशिवाय या कारवाईदरम्यान, मोहंती यांच्या आणखीही काही संपत्तीची माहिती समोर आली आहे. त्यात भुवनेश्वरमधील पहला परिसरात असलेलं दुमजली घर आणि सुमारे १३० ग्रॅम सोन्याचाही समावेश आहे. तसेच इतर शोधमोहीम सुरू आहे.