NEET Scam 2026: ७२० पैकी फक्त १०७ गुण! वडिलांनी १० लाखांत पेपर खरेदी करूनही मुलगा नापास

NEET पेपरफुटी प्रकरणात मोठा खुलासा! दिनेश बिवालने १० लाखांत पेपर खरेदी केला पण मुलाला फक्त १०७ गुण मिळाले.

'नीट-युजी २०२६' पेपरफुटी प्रकरणाचा तपास जसजसा पुढे सरकत आहे, तसतसे धक्कादायक वास्तव समोर येत आहे. आपल्या मुलाने डॉक्टर व्हावे, यासाठी एका वडिलांनी चक्क १० लाख रुपये मोजून पेपर खरेदी केला. मात्र, इतका मोठा जुगाड करूनही मुलाची बुद्धिमत्ता फिकी पडली. ७२० गुणांच्या या परीक्षेत १० लाख खर्चूनही संबंधित विद्यार्थ्याला केवळ १०७ गुण मिळवता आले आहेत. सीबीआयच्या चौकशीत या नेटवर्कचा पर्दाफाश झाला असून गुन्ह्याचे धागेदोरे राजस्थानच्या सीकरपासून ते हरियाणाच्या गुरुग्रामपर्यंत पसरले आहेत.

नेमकं काय आहे प्रकरण?

सीबीआयने या प्रकरणी दिनेश बिवाल याला अटक केली आहे. चौकशीदरम्यान दिनेशने कबुली दिली की, त्याने आपला मुलगा ऋषी याच्यासाठी १० लाख रुपयांचा व्यवहार करून लीक झालेला प्रश्नपत्र संच मिळवला होता. परीक्षेपूर्वीच प्रश्न हाती आल्याने मुलाला ६०० पेक्षा जास्त गुण मिळतील, अशी खात्री बापाला होती. पण निकाल आला तेव्हा बापाचे डोळेच पांढरे झाले; कारण मुलाला ७२० पैकी केवळ १०७ गुणच मिळाले होते.

सीकरमधील फ्लॅट बनला 'वॉर रूम'

तपासातून समोर आले आहे की, आरोपी दिनेश बिवालने राजस्थानमधील शिक्षणाचे माहेरघर असलेल्या सीकरमध्ये एक फ्लॅट भाड्याने घेतला होता. याच फ्लॅटमध्ये त्याचा मुलगा राहायचा. सीबीआयला संशय आहे की, याच फ्लॅटचा वापर करून इतर अनेक संशयित उमेदवारांपर्यंत प्रश्नपत्रिका पोहोचवण्यात आल्या. सीकर हे देशातील मोठे कोचिंग हब असल्याने, या रॅकेटचे धागेदोरे मोठ्या कोचिंग क्लासेसपर्यंत आहेत का, याचा तपास आता सीबीआय करत आहे.

टेलिग्राम आणि व्हॉट्सअ‍ॅपवर डील

तपास यंत्रणांच्या हाती आरोपींच्या चॅट्स लागल्या आहेत. नाशिकच्या एका शुभम नावाच्या व्यक्तीने गुरुग्रामच्या यश यादवशी संपर्क साधला होता. "५००-६०० प्रश्न देतो, त्यातील १५० जरी मूळ परीक्षेत आले तर १० लाख रुपये द्यावे लागतील," अशी ही डील होती. २९ एप्रिल २०२६ रोजी टेलिग्रामवर पीडीएफ स्वरूपात हे प्रश्न पाठवण्यात आले होते. सुरक्षेसाठी विद्यार्थ्यांची मूळ कागदपत्रे आणि कोरे चेकही गहाण ठेवण्यात आले होते.

नातेवाईकांनाही वाटल्या खिरापतीसारख्या प्रश्नपत्रिका

हा केवळ एका विद्यार्थ्यापुरता मर्यादित मामला नव्हता. आरोपी मंगीलालने हा कथित लीक झालेला पेपर आपला मुलगा अमन, नातेवाईक ऋषी आणि गुंजन यांच्यासह अनेक मित्र-मंडळींनाही वाटला होता. इतकेच नाही तर काही शिक्षकांपर्यंतही या प्रश्नपत्रिका पोहोचवण्यात आल्या होत्या. सीबीआयने आतापर्यंत ५ जणांना ७ दिवसांच्या रिमांडवर घेतले आहे.

पुराव्यांची नष्टाचर्या आणि आयफोनचे गूढ

या प्रकरणातील मुख्य दुवा मानल्या जाणाऱ्या यश यादवने आपल्या आयफोनमधील महत्त्वाचा डेटा आणि चॅट्स डिलीट केल्याचे समोर आले आहे. मात्र, सीबीआयने हा फोन फॉरेन्सिक लॅबमध्ये पाठवला असून डिलीट झालेला डेटा रिकव्हर केल्यानंतर आणखी मोठे मासे गळाला लागण्याची शक्यता वर्तवली जात आहे.