मिस वर्ल्ड ओपल सुचाता चुआंगश्री म्हणाली, पंतप्रधान मोदींना भेटून आभार मानायचे आहेत !

१०८ देशांच्या सुंदरींमध्ये ओपल सुचाता चुआंगश्री हिने मिस वर्ल्ड म्हणून मारली बाजी

हैदराबाद: पंतप्रधाननरेंद्र मोदी यांना भेटून आभार मानायचे आहेत, असे मिस वर्ल्ड ओपल सुचाता चुआंगश्री हिने म्हटले. हैदराबादेत १०८ देशांच्या सुंदरींमध्ये बाजी मारलेली मिस वर्ल्ड ओपल सुचाता चुआंगश्री हिने म्हटले की, मला पंतप्रधाननरेंद्र मोदींना भेटायचे आहे. आम्हा सर्वांना हा एवढा अद्भूत अनुभव घेण्याची संधी दिल्याबद्दल मला त्यांचे आभार मानायचे आहेत. आता मला हा किताब मिळाल्यामुळे माझ्याकडे अन्य लोकांची स्वप्ने साकार करण्याची व प्रभावशाली बनवण्याची संधी मिळाली आहे. एक वर्षापर्यंत मी मिस वर्ल्ड संघटनेबरोबर मिळून हेच काम करू इच्छिते, असे ती म्हणाली.

भारत कायम लक्षात राहील

भारतात घालवलेला काळ मला कायम स्मरणात राहील. खरे तर ही जागाच मला सोडावी वाटत नाही. आम्ही इथे राहिलो. येथील लोक, येथील जेवण आणि प्रत्येक गोष्टच खूप चांगली आहे. मला येथे येऊन खूपच आनंदी वाटले. जीवनातील फारच अविस्मरणीय काळ आम्ही येथे घालवला आहे.

थायलंडला प्रथमच मिस वर्ल्ड

ओपलने म्हटले आहे की, थायलंडचे लोक ७२ वर्षांपेक्षा अधिक काळापासून मिस वर्ल्डच्या किताबची प्रतीक्षा करीत आहेत. माझा अजूनही विश्वास बसत नाही, की माझ्या देशातून हा किताब जिंकण्याचा पहिला मान मला मिळाला आहे. मला फार अभिमान वाटतो आहे. केवळ माझाच नव्हे तर माझे लोक, माझ्या टीमचा अभिमान वाटतो. कारण त्यांच्यामुळेच हे झाले आहे.

ब्रेस्ट कॅन्सरबद्दल जागरूकता करायची आहे

ओपलने म्हटले आहे की, महिलांमध्ये ब्रेस्ट कॅन्सरबाबत जागरूकता निर्माण करायची आहे. महिलांच्या आरोग्याबाबतही खूप काही करायचे आहे. मला संधी मिळाली, तर मी सर्वांनाच मदत करण्यासाठी तयार आहे. सर्वांनी आरोग्याची काळजी घेतली पाहिजे. वेळोवेळी तपासण्या करून घेतल्या पाहिजेत. लोक म्हणायचे, तू हे करू शकणार नाहीस... फार पूर्वी माझे राजदूत बनण्याचे स्वप्न होते. मी महिला असल्यामुळे मी हे करू शकणार नाही, असे लोक मला म्हणायचे. त्यांचे म्हणणे होते की, या क्षेत्रात महिलांनी काम करणे खूप अवघड होते. परंतु, मी त्यांच्याकडे लक्ष दिले नाही. माझा स्वत:वर विश्वास होता. मी विद्यापीठात आंतरराष्ट्रीय संबंध हा विषय सखोल शिकले.