तीन जणांना फाशी, ७०० अटकेत, युद्धविरामानंतर इराणची मोसादच्या हेरांवर कठोर कारवाई

Israel Iran ceasefire: इस्राइलने इराणविरोधात केलेल्या कारवाईमध्ये इस्राइलची गुप्तचर संस्था असलेल्या मोसादच्या इराणमधील गुप्तहेरांनी दिलेली माहिती महत्त्वपूर्ण ठरली होती. त्यामुळे इराणने आता आपल्या देशात असलेल्या मोसादच्या अंडरकव्हर एजंटवर कठोर कारवाई करण्यास सुरुवात केली आहे.

सुमारे १२ दिवस भीषण संघर्ष चालल्यानंतर इस्राइल आणि इराण यांच्यात युद्धविराम लागू झाला आहे. हल्ले प्रतिहल्ले थांबले तरी दोन्ही देशांमधील तणाव कमी झालेला नाही. इस्राइलने इराणविरोधात केलेल्या कारवाईमध्ये इस्राइलची गुप्तचर संस्था असलेल्या मोसादच्या इराणमधील गुप्तहेरांनी दिलेली माहिती महत्त्वपूर्ण ठरली होती. त्यामुळे इराणने आता आपल्या देशात असलेल्या मोसादच्या अंडरकव्हर एजंटवर कठोर कारावी करण्यासा सुरुवात केली आहे. तसेच इराणने आज सकाळी तीन व्यक्तींना इस्राइलसाठी हेरगिरी केल्याच्या आणि हत्येचा प्रयत्न केल्याच्या आरोपाखाली फाशी दिली आहे. तसेच आतापर्यंत सुमारे ७०० जणांना अटक करण्यात आली आहे. 

याबाबत इराणकडून देण्यात आलेल्या माहितीनुसार इदरीस अली, आझाद शोजाई आणि रसूल अहमद या तिघांनी हत्येसाठा वापरण्यात येणारी उपकरणे इस्राइलमध्ये आणण्याचा प्रयत्न केला होता. या प्रकरणी तिन्ही आरोपींविरोधात खटला चालवण्यात आला. तर आझ सकाळई उमरिया शहरामध्ये त्यांना फाशी देण्यात आली.

उमरिया हे इराणच्या उत्तर-पश्चिमेला असलेलं शहर आहे. ते तुर्कीच्या सीमेपासून जवळ आहे. दरम्यान, फाशीच्या वृत्ताला दुजोरा देताना इराणमधील प्रसारमाध्यमांनी तीनही आरोपींचे तुरुंगातील निळ्या कपड्यांमधील फोटो प्रसिद्ध केले आहेत. दरम्यान, इराणकडून शत्रू राष्ट्राच्या हेरांविरोधात अशी कठोर कारवाई करण्याची ही पहिलीच वेळ नाही आहे. इराणकडून इस्राइल आणि इतर परदेशी गुप्तहेर संस्थांसाठी हेरगिरी करण्याच्या संशयावरून पकडण्यात आलेल्या अनेक जणांना आधीही फाशी दिली गेली आहे. 

दरम्यान, १३ जूनपासून इस्राइल आणि इराणमध्ये तीव्र संघर्ष सुरू झाल्यानंतर इराणने इस्राइलसाठी काम करणाऱ्या गुप्तहेरांविरोधात कठोर कारवाईला सुरुवात करण्याचा इशारा दिला होता. त्याअंतर्गतच रविवारी आणि सोमवारी काही आरोपींना फाशी दिली गेली होती.