"अमेरिकेला गुडघे टेकायला लावले, इराण बनला मुस्लिम जगताचा नेता’’, महबूबा मुफ्ती यांनी केलं कौतुक  

Israel Iran Ceasefire: जम्मू काश्मीरच्या माजी मुख्यमंत्री आणि पीडीपीच्या नेत्या महबूबा मुफ्ती यांनी इस्राइलविरुद्धच्या संघर्षात घेतलेल्या आक्रमक पवित्र्याचं कौतुक केलं आहे. तसेच या संघर्षामधून इराण हा मुस्लिम जगतामधील नवा नेता म्हणून समोर आला आहे, असे मुफ्ती यांनी म्हटले आहे.

मागच्या १२ दिवसांपासून इस्राइल आणि इराण यांच्यातील संघर्ष संपुष्टात आला असून, दोन्ही देश युद्धविरामासाठी सहमत झाले आहेत. या युद्धामध्ये इराणने दाखवलेल्या कमालीच्या आक्रमकतेची दखल जगभरातून घेतली जात आहे. दरम्यान, जम्मू काश्मीरच्या माजी मुख्यमंत्री आणि पीडीपीच्या नेत्या महबूबा मुफ्ती यांनी इस्राइलविरुद्धच्या संघर्षात घेतलेल्या आक्रमक पवित्र्याचं कौतुक केलं आहे. तसेच या संघर्षामधून इराण हा मुस्लिम जगतामधील नवा नेता म्हणून समोर आला आहे, असे मुफ्ती यांनी म्हटले आहे.

सुमारे १२ दिवस चाललेल्या या संघर्षामधून इराणने अमेरिका आणि इस्राइलला चांगला धडा शिकवला आहे, ही जगभरातील अभिमानाची बाब आहे, अशा शब्दात महबूबा मुफ्ती यांनी इराणची प्रशंसा केली आहे. त्या म्हणाल्या की, अमेरिकेसारख्या महाशक्तीसोबत लढण्यासाठी मी इराणमधील जनता, तिथलं लष्कर आणि नेतृत्वाला सलाम करते. इराणकडे फारमोठा शस्त्रसाठा, अणुबॉम्ब असं काही नव्हतं. तरी त्यांनी या युद्धात अमेरिका आणि इस्राइलला धूळ चारली. तसेच अखेरीस युद्धविरामाची मागणी इराणकडून करण्यात आली नाही. या युद्धामुळे इराणची प्रशंसा वाढली आहे. तसेच मुस्लिम जगतामध्ये इराण हा जागतिक नेतृत्व म्हणून समोर आला आहे, अशा शब्दात महबूबा मुफ्ती यांनी इराणचं कौतुक केलं आहे.

महबूबा मुफ्ती पुढे म्हणाल्या की, इराणने अमेरिकेला असा धडा शिकवला आहे, जो दीर्घकाळापर्यंत लक्षात ठेवला जाईल. हा संघर्ष थांबवण्यासाठी डोनाल्ड ट्रम्प यांना कतारची मदत घ्यावी लागली. तसेच इस्राइल युद्धविरामास तयार आहे, आता तुम्ही इराणला युद्धविरामासाठी तयार करा, असं सांगावं लागलं. एक मुस्लिम म्हणून आणि संपूर्ण जगभरातील मुस्लिमांसाठी ही आनंदाची बाब आहे.  मात्र दुर्दैवाने कुठल्याही मुस्लिम देशाने या संघर्षात इराणला मदत केली नाही, अशा शब्दात महबूबा मुफ्ती यांनी नाराजी व्यक्त केली.