Iran Israel war: अमेरिकी युद्धनौका, विमाने इराणच्या दिशेने, हल्ला करण्यासाठी पूर्वतयारी?

इराणवर अमेरिकेने हवाई हल्ले करायचे ठरविल्यास त्यावेळी इंधन भरणारी विमाने महत्त्वपूर्ण भूमिका बजावणार आहेत.

वॉशिंग्टन : इराणविरुद्धच्यायुद्धातइस्रायलला मदत करण्यासाठी अमेरिकेची युद्धनौका पश्चिम आशियाच्या दिशेने वळविण्यात आली असून, विमानांत हवेत इंधन भरू शकणारी विमाने अमेरिकी तळांवरून युरोपच्या दिशेने रवाना झाल्याचे सांगण्यात येते. (Iran Israel war news)

इराणवर अमेरिकेने हवाई हल्ले करायचे ठरविल्यास त्यावेळी इंधन भरणारी विमाने महत्त्वपूर्ण भूमिका बजावणार आहेत. इराणवर हल्ला करण्यासाठी अमेरिकेची चाललेली पूर्वतयारी, असे या हालचालींकडे पाहिले जात आहे.

इराणमधून ८२७ भारतीय मायदेशी परतले

भारताने 'ऑपरेशन सिंधू' अंतर्गत इराणमध्ये अडकलेल्या भारतीयांपैकी आतापर्यंत ८२७ जणांना सुरक्षितरीत्या मायदेशी परत आणले आहे. ही माहिती परराष्ट्र मंत्रालयाचे प्रवक्ते रणधीर जयस्वाल यांनी शनिवारी दिली.

जर्मन सायकलपटूला अटक 

इराणने एका जर्मन सायकलपटूला हेरगिरीच्या आरोपाखाली अटक केल्याची कबुली शनिवारी प्रथमच दिली. जर्मनीवर दबाव आणण्याचा हा प्रयत्न असू शकतो.

इराणचे तीन अधिकारी ठार

तेल अवीव : इस्रायल आणि इराण यांच्यात सुरू असलेल्या युद्धाने दुसऱ्या आठवड्यात प्रवेश केला आहे. इराणच्या अणुसंशोधन केंद्रावर हल्ला केला असून, त्यात त्या देशाचे तीन वरिष्ठ लष्करी अधिकारी ठार झाल्याचा दावा इस्रायलच्या लष्कराने शनिवारी केला. 

इराणचा अणुकार्यक्रम पूर्णपणे बंद पाडण्यासाठी गेल्या काही दिवसांत इस्रायलने हे हल्ले केले. इस्फहान भागात शनिवारी केलेल्या हल्ल्यात तेथील अणुसंशोधन केंद्राचे मोठे नुकसान झाल्याचे सांगण्यात आले.