धक्कादायक! प्रियकराचा लग्नास नकार; प्रेयसीसह ६ मैत्रिणींनी विष खाल्लं; तिघींचा मृत्यू

सहा तरुणींनी विष खाल्ल्यानं गावात खळबळ; ग्रामस्थांवर शोककळा

औरंगाबाद: बिहारच्या औरंगाबादमध्ये एक धक्कादायक घटना घडली आहे. एकाचवेळी सहा मैत्रिणींनी विष खाल्ल्याचा प्रकार घडला आहे. यातल्या तिघींचा मृत्यू झाला आहे. घटनेनंतर परिसरात खळबळ माजली. मैत्रिणींपैकी एकीचे एका तरुणासोबत प्रेमसंबंध होते. त्यानं लग्नास नकार दिल्यानं सगळ्या तरुणींनी विष खाऊन आत्महत्येचा प्रयत्न केला.

ओरंगाबादमधील कासमा पोलीस ठाण्याचा हद्दीत घडलेल्या घटनेनं एकच खळबळ उडाली आहे. शुक्रवारी संध्याकाळी सहा मैत्रिणींनी एकाचवेळी विष खाऊन आत्महत्येचा प्रयत्न केला. यापैकी तिघींचा मृत्यू झाला. तर तिघींची प्रकृती गंभीर आहे. त्यांच्यावर मगध वैद्यकीय महाविद्यालय आणि रुग्णालयात उपचार सुरू आहेत. त्या तिघींची प्रकृती चिंताजनक आहे.

औरंगाबादचे एसपी कांतेश कुमार मिश्रांनी दिलेल्या माहितीनुसार, मृतांपैकी एका तरुणीचे तिच्या भावाच्या मेहुण्याशी प्रेमसंबंध होते. तिनं याची माहिती मैत्रिणींना दिली होती. तरुणीनं प्रियकराकडे लग्नासाठी आग्रह धरला. त्यावेळी तिथे तिच्या मैत्रिणीदेखील उपस्थित होत्या. मात्र तरुणानं लग्नास नकार दिला. त्यानंतर सगळ्या तरुणी गावाकडे परतल्या. तरुणाच्या नकारानंतर त्याची प्रेयसी विष खात असल्याचं तिच्या मैत्रिणींनी पाहिलं. त्यानंतर सगळ्याच मैत्रिणींनी विष खाल्लं.

घटनेची माहिती गावात पसरताच खळबळ माजली. ग्रामस्थांनी तरुणींना वाचवण्याचा प्रयत्न केला. मात्र तीन तरुणींचा मृत्यू झाला. अन्य ती तरुणींना उपचारांसाठी मगध वैद्यकीय महाविद्यालयात दाखल करण्यात आलं. एकाचवेळी सहा तरुणींनी विष खाल्ल्यानं आणि त्यातल्या तिघींचा मृत्यू झाल्यानं गावावर शोककळा पसरली आहे. तरुणींच्या कुटुंबीयांवर दु:खाचा डोंगर कोसळला आहे. सर्व तरुणी गुरारूला गेल्या होत्या आणि तिथून परतल्यावर त्यांनी विष खाल्ल्याची माहिती मिळत आहे.