विमानात फिट येऊन खुर्चीवरून खाली पडली, नेर्लेतील डॉक्टरांच्या तत्परतेमुळे वाचले मुलीचे प्राण; क्वॉलालंपूर ते बंगळुरू प्रवासातील घटना

यादरम्यान विमानातील इतर प्रवासी भयभीत झाले. मुलीचे प्राण वाचवल्याबद्दल हवाई सुंदरीनी डॉक्टरांचे मानले आभार

ईश्वरपूर : नेर्ले (ता. वाळवा) येथील डॉ. अमित सूर्यवंशी यांनी मलेशियातील क्वॉलालंपूर ते बंगळुरू विमान प्रवासादरम्यान ३५ हजार फुटाच्या उंचीवर असताना बंगळुरूच्या १७ वर्षीय योग खेळाडू मुलीचे प्राण वाचवत तिला जीवदान दिले. डॉ. सूर्यवंशी हे अंकलखोप येथे समुदाय आरोग्य अधिकारी म्हणून काम पाहतात.

बुधवारी पहाटे डॉ. सूर्यवंशी हे या विमानातून प्रवास करीत होते. त्याचवेळी मलेशियातील योगा स्पर्धा खेळून बंगळुरू येथील १७ वर्षांची युवती तिच्या कुटुंबासह परतत होती. यावेळी तिला विमानातच फिट येऊन ती खुर्चीवरून खाली पडून बेशुध्द अवस्थेकडे निघाली होती. यावेळी डॉ. सूर्यवंशी यांनी क्षणाचाही विलंब न करता या मुलीकडे धाव घेत तिच्यावर उपचार सुरू केले.

या मुलीच्या तोंडातून आलेला फेस त्यांनी बाजूला करत तिचा श्वास घेण्याचा मार्ग मोकळा केला. तसेच तिच्या दातखीळ बसलेल्या तोंडामध्ये धाडसाने दोन बोटे घालून जीभ चावण्यापासून रोखले. याचवेळी अंबू बॅगव्दारे तिला ऑक्सिजनचा पुरवठा सुरू केला. तिच्या भोवतालचे वातावरण मोकळे ठेवले. शेवटी विमानाच्या पाठीमागील लॉबीमध्ये तिला ठेवून तिच्या नाडीचे ठोके, हृदय गती यावर लक्ष केंद्रीत करत तिला औषध खायला देऊन प्रवास संपेपर्यत डॉ. सूर्यवंशी यांनी तिच्यावर लक्ष ठेवले. 

यादरम्यान विमानातील इतर प्रवासी भयभीत झाले होते. मात्र, त्यांनाही दिलासा देत डॉ. सूर्यवंशी यांनी हवाई सुंदरी आणि विमान कंपनीच्या कर्मचाऱ्यांच्या सहकार्याने या मुलीचे प्राण वाचवण्यात यश मिळवले. या कामगिरीबद्दल विमान कंपनीच्या कर्मचाऱ्यांनी त्यांना आभारपत्र देऊन कृतज्ञता व्यक्त केली.