ज्याची भीती होती तेच झाले...! बिहारमध्ये पेट्रोल ५ रुपयांनी महागले; डिझेलच्या किमतीतही ३ रुपयांची वाढ

Petrol Diesel Price Hike Latest news: बिहारमध्ये इंधन दरवाढीचा भडका! प्रीमियम पेट्रोलनंतर आता सर्वसामान्यांच्या खिशाला कात्री लागणार? जाणून घ्या नवे दर

आंतरराष्ट्रीय बाजारात कच्च्या तेलाच्या किमतीत होणारी वाढ आणि मध्यपूर्वेतील तणावाचा थेट परिणाम आता बिहारमधील इंधन दरांवर दिसू लागला आहे. गेल्या काही दिवसांत प्रीमियम पेट्रोल आणि इंडस्ट्रियल डिझेलच्या किमती वाढल्यानंतर, आता सामान्य पेट्रोल आणि डिझेलच्या किमतीतही वाढ करण्यात आली आहे. 

गुरुवारी सकाळी ६ वाजेपासून पेट्रोल आणि डिझेलच्या नवीन किमती लागू करण्यात आल्या आहेत. आंतरराष्ट्रीय बाजारातील कच्चे तेल आणि कर संरचनेतील बदलांमुळे ही दरवाढ झाल्याचे सांगण्यात येत आहे.

या दरवाढीमुळे पेट्रोलने ११० रुपयांचा टप्पा ओलांडला आहे, पेट्रोलमध्ये प्रति लिटर ५ रुपयांची वाढ करण्यात आली आहे. जुनी किंमत १०५.३५ रुपयांवरून आता ११०.३५ रुपये झाली आहे. तर डिझेलमध्ये प्रति लिटर ३ रुपयांची वाढ करण्यात आली आहे. जुनी किंमत ९१.५८ रुपयांवरून आता ९४.५८ रुपये झाली आहे.

मालवाहतूक आणि प्रवासावर परिणाम
डिझेलच्या किमतीत ३ रुपयांनी वाढ झाल्यामुळे ट्रक, टेम्पो आणि इतर मालवाहतूक करणाऱ्या वाहनांचा खर्च वाढणार आहे. याचा थेट परिणाम फळे, भाजीपाला आणि धान्याच्या किमतीवर होऊ शकतो. तसेच, बस आणि रिक्षा भाड्यातही वाढ होण्याची शक्यता असल्याने सर्वसामान्यांचे बजेट कोलमडणार आहे.

प्रीमियम पेट्रोल आणि डिझेलमध्ये मोठी वाढ
ऑईल मार्केटिंग कंपन्यांनी प्रीमियम पेट्रोलच्या किमतीत आधीच प्रति लिटर २ रुपयांची वाढ केली आहे. मात्र, सर्वात मोठा फटका इंडस्ट्रियल डिझेलला बसला असून, त्याच्या किमतीत प्रति लिटर २२ रुपयांची मोठी वाढ करण्यात आली आहे.

आंतरराष्ट्रीय घडामोडींचा फटका
तज्ज्ञांच्या मते, जागतिक बाजारपेठेत कच्च्या तेलाच्या किमतीत झालेली वाढ आणि मध्यपूर्वेतील (इराण-अमेरिका) तणावामुळे इंधन आयातीचा खर्च वाढला आहे. यामुळे येणाऱ्या काळात किमतीत आणखी बदल होण्याची शक्यता नाकारता येत नाही.