हत्येप्रकरणी डेरा सच्चा सौदा प्रमुखाची मुक्तता; पंजाब-हरयाणा उच्च न्यायालयाचा निकाल

२००२मध्ये एका पत्रकाराच्या हत्या प्रकरणात डेरा सच्चा सौदाचे प्रमुख गुरमीत राम रहीम सिंग याची पंजाब व हरियाणा उच्च न्यायालयाने निर्दोष मुक्तता केली.

चंडीगड : २००२मध्ये एका पत्रकाराच्या हत्या प्रकरणात डेरा सच्चा सौदाचे प्रमुख गुरमीत राम रहीम सिंग याची पंजाब व हरियाणा उच्च न्यायालयाने निर्दोष मुक्तता केली. ही माहिती त्याचे वकील जितेंद्र खुराना यांनी शनिवारी दिली. न्यायालयाने डेरा प्रमुखाला दोषी ठरवून जन्मठेपेची शिक्षा सुनावल्यानंतर सात वर्षांहून अधिक कालावधीनंतर त्यांची निर्दोष मुक्तता केली. पंजाब व हरयाणा उच्च न्यायालयाचे मुख्य न्यायाधीश शील नागू यांच्या अध्यक्षतेखालील उच्च न्यायालयाच्या विभागीय खंडपीठाने शनिवारी पत्रकार रामचंद्र छत्रपती यांच्या हत्या प्रकरणात गुरमीत राम रहीम सिंग याची निर्दोष मुक्तता केली असे खुराना यांनी सांगितले. मात्र, या प्रकरणातील इतर तीन आरोपींची शिक्षा खंडपीठाने कायम ठेवली आहे. डेरा प्रमुख सध्या रोहतक येथील सुनारिया तुरुंगात आहे. २०१७मध्ये दोन महिला शिष्यांवर बलात्कार केल्याप्रकरणी सुनावलेली २० वर्षांची शिक्षा तो सध्या भोगत आहे.

अशी आहे पत्रकाराच्या हत्येची कहाणी

सिरसा येथील डेरा मुख्यालयात महिलांवर लैंगिक शोषण होत असल्याचा उल्लेख असलेले एक अनामिक पत्र रामचंद्र छत्रपती यांच्या ‘पूरा सच’ या वृत्तपत्रात प्रकाशित झाल्यानंतर ऑक्टोबर २००२मध्ये छत्रपती यांच्यावर त्यांच्या घराबाहेर गोळीबार करण्यात आला होता.त्यांचा गंभीर जखमी झाल्याने मृत्यू ओढवला. या प्रकरणात राम रहीम याच्यावर हत्येचा कट रचल्याचा आरोप ठेवून गुन्हा दाखल झाला.  रामचंद्र छत्रपती यांचे पुत्र अंशुल यांनी सांगितले की, पंजाब व हरयाणा उच्च न्यायालयाच्या या निर्णयाला सर्वोच्च न्यायालयात आव्हान देण्यात येईल. 

•