मुख्यमंत्री योगींसंदर्भात वादग्रस्त वक्तव्य, मौलाना अब्दुल्ला सलीमला बिहारमधून उचललं; आता होणार UP स्टाईल न्याय?

या कारवाईनंतर दोन्ही राज्यांची पोलीस यंत्रणा सतर्क झाली असून प्रकरणाचा सखोल तपास सुरू आहे...

गौमाता आणि योगी आदित्यनाथ यांच्या आईसंदर्भात आक्षेपार्ह वक्तव्य करणाऱ्या मौलाना अब्दुल्ला सलीमला अखेर पोलिसांनी बेड्या ठोकल्या आहेत. उत्तर प्रदेशपोलिसांनी बिहारच्या पूर्णिया जिल्ह्यातून मौलानाला ताब्यात घेतले. ट्रान्झिट रिमांडची प्रक्रिया पूर्ण करून त्याला उत्तर प्रदेशात नेले जात आहे. या कारवाईनंतर दोन्ही राज्यांची पोलीस यंत्रणा सतर्क झाली असून प्रकरणाचा सखोल तपास सुरू आहे.

मौलानाचा एत व्हिडिओ सोशल मीडियावर प्रचंड व्हायरल झाला. यात एका धार्मिक कार्यक्रमादरम्यान (जलसा) मौलाना सलीमने मुख्यमंत्री आणि त्यांच्या आई संदर्भात वादग्रस्त विधान केले होते. यामुळे सामाजिक आणि राजकीय पातळीवर संतापाची लाट उसळली. अनेक संघटनांनी हे भडकाऊ आणि असंवेदनशील असल्याचे म्हणत संबंधित मौलानाविरोधात कठोर कारवाईची मागणी केली होती. लखनौमधील हजरतगंज भागात काही तरुणांनी निदर्शनही केले. परिवर्तन चौक आणि गांधी पार्क परिसरात मौलानाविरुद्ध निषेधाचे पोस्टरदेखील लावण्यात आले होते. हे पोस्टर नंतर, खबरदारी म्हणून पोलिसांकडून हटवण्यातही आले होते.

मिळालेल्या माहितीनुसार, मौलाना सलीमने आपल्या भाषणात उत्तर प्रदेशातील गोहत्या बंदी कायद्यावर टीका करताना अत्यंत प्रक्षोभक भाषेचा वापर केला होता. या प्रकरणी उत्तर प्रदेशातील विविध शहरांमध्ये मौलानाविरुद्ध १२० हून अधिक गुन्हे (FIR) दाखल करण्यात आले होते. अटकेची शक्यता वाटू लागल्यानंतर, मोलानाने आपल्या समर्थकांना सोशल मीडिया आणि रस्त्यावर उतरून विरोध करण्याचे आवाहनही केले होते, यामुळे परिस्थिती अधिकच संवेदनशील बनली होती.

सध्या उत्तर प्रदेश पोलीस मौलानाला लखनौमध्ये घेऊन जात आहेत. तेथे त्याची पुढील चौकशी आणि न्यायालयीन प्रक्रिया पार पाडली जाईल. या संपूर्ण घटनाक्रमानंतर, दोन्ही राज्यांतील पोलीस हाय अलर्टवर असून कायदा आणि सुव्यवस्था राखण्यासाठी दक्ष आहेत.