Uttarakhand Cloudburst: उत्तराखंडमध्ये पावसाचा कहर, यमुनोत्री मार्गावर ढगफुटी; अनेक कामगार बेपत्ता, बचावकार्य सुरू

Uttarakhand Uttarkashi Cloudburst News: उत्तराखंडच्या उत्तरकाशीमध्ये ढगफुटी झाली. आठ ते नऊ कामगार बेपत्ता झाले असून त्यांचा शोध सुरू आहे.

उत्तराखंडमध्ये शनिवारी मध्यरात्रीपासून मुसळधार पाऊस सुरू आहे. उत्तरकाशीमध्ये यमुनोत्री महामार्गावर पालीगाड ओजरी डाबरकोट दरम्यान ढगफुटी झाल्याने मोठी दुर्घटना घडली. या दुर्घटनेत ८ ते ९ कामगार बेपत्ता झाल्याची माहिती समोर येत आहे. शिवाय, यमुनोत्री मार्गावरील वाहतूकही विस्कळीत झाली आहे. या घटनेची माहिती मिळताच एसडीआरएफ, पोलीस आणि महसूल विभागाच्या पथकांनी घटनास्थळी पोहोचून बचाव आणि मदत कार्य सुरुवात केली आहे.

ही घटना मध्यरात्री १२ वाजताच्या सुमारास घडली. एका अधिकाऱ्याने दिलेल्या माहितीनुसार, उत्तराखंडमधील उत्तरकाशीमध्ये गेल्या दोन तीन दिवसांपासून सतत पाऊस पडत आहे. शनिवारी रात्री उशीरा यमुनोत्री महामार्गावर पालीगाड ओजरी डाबरकोट दरम्यान ढगफुटी झाल्याची माहिती मिळाली. त्यानंतर एसडीआरएफ, पोलिस आणि महसूल विभागाचे पथक घटनास्थळी रवाना झाले. चौकशीदरम्यान, आठ ते नऊ कामगार बेपत्ता झाल्याची माहिती मिळाली असून त्यांचा शोध सुरू आहे.

#WATCH | Uttarkashi, Uttarakhand | 8-9 workers staying at an under-construction hotel site went missing after the construction site was damaged due to a cloud burst in Silai Band on Barkot-Yamunotri Marg. Yamunotri Marg has also been affected: Uttarkashi DM Prashant Arya

Rescue… pic.twitter.com/k6FiyZCdCa

— ANI (@ANI) June 29, 2025

आपत्ती व्यवस्थापन सचिव विनोद कुमार सुमन म्हणाले की, "घटनास्थळी युद्धपातळीवर बचावकार्य सुरू आहे. १५ लोक बचाव कार्यात गुंतले आहेत. घटनास्थळी मशीन्स पोहोचू शकत नसल्याने बचावकार्यात अडथळा निर्माण होत आहे. संबंधित कामगार एकतर ढिगाऱ्यात अडकले आहेत किंवा पाण्याच्या प्रवाहात वाहून गेले आहेत, त्यांचा शोध सुरू आहे", असे ते म्हणाले.

ढगफुटीच्या घटनेनंतर यमुनोत्री महामार्गावरील वाहतूक विस्कळीत झाली आहे. राष्ट्रीय महामार्ग विभागाचे पथक रस्ता मोकळा करण्याचे प्रयत्न करत आहेत. शिवाय, ओझरीजवळचा रस्ता पूर्णपणे वाहून गेल्याने नागरिकांचा संपर्क तुटला आहे. शेताचेही मोठ्या प्रमाणात नुकसान झाले आहे. तसेच यमुना नदीच्या पातळीत वाढ झाली असून स्यानायट्टी येथील कुपडा कुंशाला त्रिखिली मोटर पूलही धोक्यात आला आहे. 

हवामान विभागाने दिलेल्या माहितीनुसार, उत्तराखंडमध्ये अनेक जिल्ह्यात पावसाचा जोर वाढण्याची शक्यता आहे. येत्या १ जुलैपर्यंत देहारादूनसह टिहरी, पौडी, चंपावत, हरिद्वार, नैनिताल आणि उधमसिंह नगर जिल्ह्यातील काही भागांमध्ये मुसळधार पावसाची शक्यता वर्तवण्यात आली आहे.