गुटखा थुंकण्यासाठी चालकाने धावत्या गाडीचा दरवाजा उघडला; व्यापाऱ्याचा मृत्यू, ३ जखमी

छत्तीगडमध्ये एका भीषण अपघातात एका व्यापाऱ्याचा मृत्यू झाला असून तीन जण जखमी झाले आहेत.

Chhattisgarh Accident:छत्तीसगडमधील बिलासपूर येथे रविवारी रात्री उशिरा झालेल्या कार अपघातात एकाचा मृत्यू झाला तर तीन जण गंभीर जखमी झाले.  इनोव्हा चालकाच्या निष्काळजीपणामुळे हा भीषण अपघात झाला. त्यामध्ये एका व्यावसायिकाचा मृत्यू झाला तर तीन जण जखमी झाले. इनोव्हा चालकाने १०० किमी प्रतितास पेक्षा जास्त वेगाने गाडी चालवत असताना गुटखा थुंकण्यासाठी दरवाजा उघडला, ज्यामुळे गाडी उलटली आणि हा अपघात झाला. या अपघाताचे सीसीटीव्ही फुटेज समोर आले असून त्यामध्ये प्रचंड वेगात असलेली गाडी उलटत असताना दिसत आहे.

मृत व्यक्तीचे नाव जॅकी गेही असे आहे, जो कापड व्यवसायिक आहे. गुटखा थुंकण्यासाठी जॅकीच्या चालकाने कारचा दरवाजा उघडला होता. त्यामुळे इनोव्हा कार अनियंत्रित झाली आणि मोठा अपघात झाला. ही घटना रात्री उशिरा २ ते ३ वाजण्याच्या दरम्यान चाकरभट्टा पोलिस स्टेशन हद्दीतील बिलासपूर-रायपूर रोडवरील गुरु नानक ढाब्यालगत घडली. इनोव्हा रस्त्यावरून उलटली आणि इतर दोन वाहनांना धडकली, ज्यामुळे दुसराही चालक जखमी झाला.

पोलिसांनी दिलेल्या माहितीनुसार, चक्रभठ्ठा येथील रहिवासी पंकज छाब्रा, जॅकी गेही आणि आकाश चांदनी हे बिलासपूर इथे आले होते. रात्री उशिरा पार्टी केल्यानंतर तिघेही इनोव्हा कारने घरी परतत होते. वाटेत त्यांची कार नियंत्रणाबाहेर गेली आणि डिव्हायडरला धडकली. धडक इतकी जोरदार होती की इनोव्हा रस्त्यावर गोलगोल फिरत राहिली. फिरणाऱ्या कारचा वेग इतका जास्त होता की कारचे दरवाजे उघडले आणि तिन्ही तरुण वेगवेगळ्या दिशेने रस्त्यावर पडले.

जॅकी डिव्हायडरजवळील लोखंडी अँगलला धडकला. त्याच्या डोक्याला, छातीला आणि खांद्याला गंभीर दुखापत झाली ज्यामुळे त्याचा जागीच मृत्यू झाला. कार चालवणारा आकाश चांदनी आणि मागे बसलेला पंकज छाब्रा यांनाही गंभीर दुखापत झाली. त्याच वेळी, अनियंत्रित इनोव्हा अपघातानंतरही थांबली नाही. रस्त्याच्या कडेला उभ्या असलेल्या टेम्पोला धडकली. त्यानंतर इनोव्हा ढाब्याबाहेर उभ्या असलेल्या एर्टिगा कारला धडकली. या धडकेत एर्टिगाच्या आत बसलेला चालकही जखमी झाला आणि त्याच्या कारचा चुराडा झाला.

घटनेची माहिती मिळताच पोलीस घटनास्थळी पोहोचले आणि सर्व जखमींना तातडीने सिम्स रुग्णालयात हलवले. डॉक्टरांनी जॅकी गेही यांना मृत घोषित केले, तर जखमींवर उपचार सुरू केले आहेत. पोलिसांनी घटनास्थळावरून अपघातग्रस्त वाहने हटवली आणि वाहतूक पूर्ववत केली.