रेल्वे रुळावर बाईक पेटवली, रीलच्या नादात जीवघेणी स्टंटबाजी तरुणाला महागात पडली!

मेरठमध्ये राहणाऱ्या तीन तरुणांनी सोशल मीडियावर व्ह्यूज मिळवण्यासाठी काय केलं, ते ऐकून तुम्हालाही धक्का बसेल!

सोशल मीडियावर प्रसिद्ध होण्याची क्रेझ अनेकदा लोकांना धोक्याच्या वाटेवर नेत असते. अशीच काहीशी घटना मेरठमध्ये घडली आहे. मेरठमध्ये राहणाऱ्या तीन तरुणांनी सोशल मीडियावर व्ह्यूज मिळवण्यासाठी काय केलं, ते ऐकून तुम्हालाही धक्का बसेल!

बाईक रेल्वे रुळांवर पार्क केली अन्... 

या तरुणांनी त्यांच्या दुचाकीला रेल्वे ट्रॅकवर नेऊन उभी केली. इतक्यावरच ते थांबले नाहीत, तर त्यांनी थेट बाईकच्या मागच्या चाकाला पेटवून, त्यावर स्टंटची दमदार रील शूट केली. त्या रीलमध्ये पेटलेल्या चाकातून उडणाऱ्या ठिणग्या , गाण्याचा जोरात आवाज, आणि हसणाऱ्या मित्रांचे आवाज हे सगळं थ्रिलिंग वाटत असलं तरी कायदेशीरदृष्ट्या त्या तरुणांना हे फारच महागात पडलं आहे.

ही घटना मेरठ-हापूर रेल्वे ट्रॅकवरील चांदसारा रेल्वे हॉल्टजवळ घडली. तरुणांचा हा व्हिडीओ एक्सवर अपलोड होताच व्हायरल झाला आणि जीआरपीच्या अधिकाऱ्यांनी त्याची अतिशय गांभीर्याने दखल घेतली. या व्हिडीओचा तपास सुरू झाला आणि लवकरच व्हिडीओतील तिघांची ओळख पटली. या तीन तरुणांमध्ये फाफुंडा गावचा साहिर, शहजाद आणि त्यांच्या एका मित्राचा समावेश आहे.

पोलिसांनी घेतलं ताब्यात

तिघांनी बाईकच्या टायरवर पेट्रोलसारखा पदार्थ ओतून लायटरने आग लावली, मग बाईक स्टार्ट करून वेगाने चाक फिरवून सोशल मीडियासाठी रील बनवली. पण, हे थोडंसं हटके करण्याचं आणि झटक्यात प्रसिद्धी मिळवण्याचं आकर्षण त्यांच्या हातात बेड्या पडूनच संपलं.

दाखल झाले गुन्हे

रेल्वे पोलिसांनी तिघांनाही ताब्यात घेतले आणि हापूर आरपीएफकडे सुपूर्द केले. तिथून त्यांची थेट तुरुंगात रवानगी झाली. आता त्यांच्यावर सार्वजनिक संपत्तीचे नुकसान, सार्वजनिक ठिकाणी अपायकारक कृत्ये, आणि रेल्वे कायद्यांखाली गुन्हे दाखल करण्यात आले आहेत.

जीआरपी इन्स्पेक्टर विनोद कुमार यांनी या प्रकरणाबद्दल बोलताना सांगितले की, सोशल मीडियासाठी असे जीवघेणे स्टंट्स करणाऱ्यांवर कठोर कारवाई केली जाईल. प्रसिद्धी मिळवण्यासाठी आपला आणि दुसऱ्यांचा जीव धोक्यात घालू नये,असा इशारा देखील त्यांनी दिला.