Plane Crash: अहमदाबादमध्ये प्रवासी विमानाच्या अपघातानंतर एअर इंडियाचे ट्विट, दिली महत्त्वाची माहिती

Air India Plane Crash Ahmedabad: विमान अहमदाबादहून लंडनला जात असून त्यात क्रू मेंबर्ससह २४२ प्रवासी असल्याची माहिती

Air India Plane Crash Ahmedabad: गुजरातमधील अहमदाबादमध्ये गुरुवारी एक मोठा विमानअपघात झाला. प्रवाशांना घेऊन जाणाऱ्या एअर इंडियाच्या विमानालाअपघात झाला. अहमदाबादमध्ये टेकऑफ दरम्यान हा अपघात झाला. विमानाने उड्डाण केल्या-केल्या लगेचच मेघानीनगरच्या रहिवासी परिसरात हे विमान कोसळले. विमान अहमदाबादहून लंडनला जात होते. वृत्तसंस्था एएनआयनुसार, विमानात क्रू मेंबर्ससह २४२ प्रवासी होते. या घटनेत किती जीवित आणि वित्तहानी झाली हे अद्याप समजू शकलेले नाही. याचदरम्यान, एअर इंडियाने या अपघाताबाबत महत्त्वाची माहिती दिली आहे.

एअर इंडियाच्या अधिकृत ट्विटर अकाऊंटवरून माहिती देण्यात आली आहे. या माहितीनुसार, अहमदाबाद-लंडन गॅटविक ही विमान उड्डाण घेतल्यानंतर फ्लाइट AI171 चा १२ जून २०२५ रोजी अपघात झाला आणि मोठी दुर्घटना झाली. सध्या, आम्ही तपशीलांची पडताळणी करत आहोत आणि लवकरच पुढील अपडेट्स http://airindia.com आणि आमच्या X हँडलवर (https://x.com/airindia) शेअर करू, अशी माहिती एअर इंडियाच्या प्रवक्त्यांनी दिले आहे.

Flight AI171, operating Ahmedabad-London Gatwick, was involved in an incident today, 12 June 2025. At this moment, we are ascertaining the details and will share further updates at the earliest on https://t.co/Fnw0ywg2Zt and on our X handle (https://t.co/Id1XFe9SfL).

-Air India…

— Air India (@airindia) June 12, 2025

१.३१ वाजता उड्डाण, १.३८ वाजता शेवटचा सिग्नल

दरम्यान, या विमानाच्या अपघातानंतर काही जखमींना रुग्णालयात दाखल करण्यात आल्याचे सांगण्यात येत आहे.अहमदाबाद हॉर्स कॅम्पजवळ हा अपघात झाला. हा परिसर सिव्हिल हॉस्पिटलजवळ आहे. विमान अपघातात मोठे नुकसान झाले आहे. राज्य पोलिस नियंत्रण कक्षाने अपघाताची पुष्टी केली आहे. अहमदाबादमधील मेघानी नगर परिसरात दुपारी १.३१ मिनिटांनी विमानाचे उड्डाण झाले आणि १.३८ मिनिटांनी विमानातून शेवटचा सिग्नल मिळाला. त्यानंतर हे विमान कोसळले.

अमित शाह यांनी घेतली अपघाताची माहिती

केंद्रीय गृहमंत्री अमित शाह यांनी गुजरातचे मुख्यमंत्री, गृहमंत्री आणि डीजीपी यांच्याशी संवाद साधला. त्यांनी विमान अपघाताची प्राथमिक माहिती घेतली. अमित शाह यांनी सर्वतोपरी मदत करण्याचे आश्वासन दिले आहे. एनएसजी टीम घटनास्थळी दाखल झाली आहे. गुजरातचे माजी मुख्यमंत्री विजय रुपाणी हे देखील विमानात चढत असल्याची माहिती समोर येत आहे. तर मुख्यमंत्री भूपेंद्र पटेल सुरतहून नुकतेच अहमदाबादला रवाना झाले आहेत.