९५ वर्षांचे आजोबा, ७० वर्ष राहत होते लिव्हइनमध्ये, आता झाली लग्न करायची इच्छा अन्...  

तब्बल ७० वर्ष लिव्हइनमध्ये राहिल्यानंतर ९५ वर्षांच्या आजोबांना आपल्या ९० वर्षांच्या सहचारिणीशी लग्न करण्याची इच्छा निर्माण झाली.

सध्या जोडप्यांमध्ये लिव्हइन रिलेशनशिपचा ट्रेंड चांगलाच वाढत आहे. काही वर्ष एकमेकांसोबत राहून पटलं तर लग्नाचा निर्णय घेणं, आणि नाहीच पटलं तर परस्पर संमतीने वेगळं होणं, हा या नात्याचा उद्देश असतो. मात्र, आता लिव्हइन रिलेशनशिपचं एक असं प्रकरण समोर आलं आहे, जे ऐकून सगळेच आश्चर्यचकित झाले आहेत. तब्बल ७० वर्ष लिव्हइनमध्ये राहिल्यानंतर ९५ वर्षांच्या आजोबांना आपल्या ९० वर्षांच्या सहचारिणीशी लग्न करण्याची इच्छा निर्माण झाली. दोघांची ही इच्छा त्यांच्या कुटुंबाने पूर्ण केली आहे.

राजस्थानातील डुंगरपूर जिल्ह्यातील गलांदर गावात हा विलक्षण विवाह सोहळा पार पडला आहे. या लग्नाची खासियत म्हणजे वर आणि वधूचं वय अनुक्रमे ९५ आणि ९० वर्षे आहे. 

७० वर्षांपासून होते लिव्ह-इनमध्ये!

गलांदर गावातील काली डोना येथील रामाभाई अंगारी आणि जीवली देवी तब्बल सात दशकांपासून एकत्र राहत होते. त्यांच्या सहजीवनातून त्यांना सहा अपत्ये झाली असून, आज त्यांच्या घरात नातवंडांचाही गोंगाट आहे. त्यांची चारही मुले सरकारी नोकरीत आहेत. यातील दोन शिक्षक, एक नर्स आणि एक मुलगी सरकारी सेवेत आहे.

आयुष्याच्या शेवटच्या टप्प्यावर घेतला मोठा निर्णय

वृद्धापकाळात, आयुष्याच्या अंतिम पर्वात, या जोडप्याने आपल्या मुलांकडे इच्छा व्यक्त केली की, "आम्ही आजवर लग्न केले नाही, पण आम्हाला आता आमच्या आयुष्यातील हा टप्पाही पार करायचा आहे." आई-वडिलांच्या या भावना ओळखून त्यांच्या मुलांनी मोठ्या उत्साहात आणि थाटामाटात विवाहसोहळ्याचं आयोजन केलं.

डीजेवर नाच, गावकऱ्यांना मेजवानी!

बुधवारी पार पडलेल्या या लग्नात डीजेवर पारंपरिक धून वाजवण्यात आल्या, गावकऱ्यांनी उत्साहात डान्स केला, आणि संपूर्ण गाव या अनोख्या विवाहाला उपस्थित राहिला. रामाभाई आणि जीवली देवी यांनी विधीवत सात फेरे घेतले आणि पारंपरिक पद्धतीने विवाहबद्ध झाले. मुलांनी गावकऱ्यांसाठी खास मेजवानीचे आयोजनही केले.

संपूर्ण गावाचे लक्ष वेधून घेणारा विवाह

रामाभाई आणि जीवली देवी यांचे सर्व मुलगे आणि मुली – बाकू अंगारी (६०), शिवराम अंगारी (५५), कांतिलाल (५२), लक्ष्मण (४२), सूना सुनीता आणि अनिता यांनी या समारंभात विशेष सहभाग घेतला. या प्रसंगी दोघेही खूप आनंदी दिसत होते आणि त्यांच्या चेहऱ्यावर समाधानाची झलक स्पष्ट दिसत होती.