५५ वर्षांची आई आणि १७ मुले! हे कुटुंब कसं चालवतंय आपला उदरनिर्वाह?

या महिलेने वयाच्या ५५ व्या वर्षी आपल्या १७व्या अपत्याला जन्म दिला आहे.

भारत सरकारने अनेक वर्षांपासून 'हम दो हमारे दो' या कुटुंब नियोजन मोहिमेवर भर दिला आहे. आरोग्य विभाग दरवर्षी यासाठी कोट्यवधी रुपये खर्च करतो. मात्र, राजस्थानमधील उदयपूर जिल्ह्यातील झाडोळ येथील एका सामुदायिक आरोग्य केंद्रातून एक धक्कादायक बाब समोर आली आहे. येथे रेखा कालबेलिया नावाच्या ५५ वर्षीय महिलेने आपल्या १७ व्या बाळाला जन्म दिला आहे.

बुधवारी झाडोळ येथील आरोग्य केंद्रात रेखा कालबेलिया यांनी एका बाळाला जन्म दिला. याआधी त्यांनी एकूण १६ मुलांना जन्म दिला होता. त्यापैकी ४ मुले आणि १ मुलगी जन्मानंतर लगेचच मरण पावली. आता या कुटुंबात एकूण १२ मुले आहेत, ज्यापैकी ५ जणांचे लग्न झाले आहे. ही बातमी समोर आल्यानंतर रुग्णालयात सर्वांनाच आश्चर्य वाटले.

जगण्यासाठी झगडणारे कुटुंब
रेखा यांचे पती कवरा कालबेलिया यांनी सांगितले की, त्यांच्याकडे राहण्यासाठी घर नाही. कुटुंबाचा उदरनिर्वाह करणे खूप कठीण आहे. मुलांना शिक्षण मिळालेले नाही. कुटुंबाला जगवण्यासाठी आणि मुलांच्या लग्नासाठी त्यांनी २०% व्याजाने कर्ज घेतले आहे, ज्यामुळे ते आर्थिक संकटात सापडले आहेत.

हे कुटुंब भंगार गोळा करून आपला उदरनिर्वाह चालवते. त्यांना अनेक समस्यांचा सामना करावा लागतो, आणि त्यांना सरकारकडून मदतीची अपेक्षा आहे.

प्रशासनाची प्रतिक्रिया
रुग्णालयाचे स्त्रीरोगतज्ज्ञ डॉ. रोशन दरांगी यांनी सांगितले की, जेव्हा रेखा यांना रुग्णालयात दाखल केले, तेव्हा त्यांच्या कुटुंबाने हे त्यांचे चौथे बाळ असल्याचे सांगितले होते. मात्र, नंतर हे त्यांचे १७ वे बाळ असल्याचे स्पष्ट झाले.

डॉक्टरांनी सांगितले की, आता आरोग्य विभागाकडून रेखा आणि त्यांच्या पतीला कुटुंब नियोजनाबाबत जागरूक केले जाईल. सध्या, आई आणि बाळ दोघेही पूर्णपणे निरोगी आहेत.