नाशिकजवळ रेल्वे रुळ ओलांडताना अपघात; दोघांचा मृत्यू, एकजण गंभीर जखमी

नाशिकमध्ये दोन जणांचा मृत्यू झाला तर एकजण गंभीर जखमी झाला आहे.

Nashik Karmabhoomi Express : नाशिक रोड रेल्वे स्थानकाजवळील जेलरोड पवारवाडी जवळ शनिवारी रेल्वे अपघातात दोन प्रवाशांचा जागीच मृत्यू झाला. तर एक जण गंभीर जखमी झाला आहे. मृत व जखमींची ओळख रात्री उशिरापर्यंत पटू शकली नव्हती. मुंबई-लोकमान्य टिळक टर्मिनस येथून निघालेली व बिहार राज्यातील रस्तोलकडे जाणारी कर्मभूमी एक्सप्रेस गाडीतील हे प्रवासी असल्याचे म्हटलं जात होतं. मात्र प्रत्यक्षात ते मजून होते आणि रेल्वेतून प्रवास करत नव्हते.

रेल्वे स्थानकाजवळील पवारवाडी जवळील साईनाथ नगर येथील मारुती मंदिराजवळ ही दुर्दैवी घटना घडली. रेल्वे रुळ ओलांडाताना दोघे गंभीर जखमी होऊन जागीच मयत झाले. या घटनेत आणखी एक मजूर गंभीर जखमी झाला आहे.  तिघांना रेल्वे रुळांजवळ पडल्याचे कळल्यानंतर  साईनाथ नगर भागातील रेल्वे लाईनजवळ राहणाऱ्या नागरिकांनी घटनास्थळी धाव घेतली. रेल्वे लोको पायलट के. एम. डेरे यांनी या अपघाताची माहिती नाशिकरोड रेल्वेस्थानक उपप्रबंधक कार्यालयात दिली. रेल्वे पोलीस व नाशिकरोड पोलिसांना घटनेची माहिती मिळताच घटनास्थळी धाव घेतली. नाशिकरोडचे वरिष्ठ पोलीस निरीक्षक जितेंद्र सपकाळे यांनी घटनास्थळी भेट देऊन पाहणी केली.

जखमी झालेल्यांकडे त्यांची ओळख पटवणारी कुठलीच कागदपत्रे नसल्याचे निरीक्षक सपकाळे यांनी सांगितले. जखमीला खाजगी रुग्णालयात दाखल करण्यात आले आहे. 

दरम्यान, दिवाळी आणि छठनिमित्त उत्तर प्रदेश, बिहार आणि झारखंड येथे जाणाऱ्या प्रवाशांची मोठी गर्दी रेल्वे स्थानकावर दिसून येत आहे. लोकमान्य टिळक रेल्वे स्थानकापासून ते देशभरातील इतर शहरांमध्ये जाणाऱ्या प्रवाशांची मोठी गर्दी दिसून येत आहे. बिहार, उत्तर प्रदेशकडे जाणाऱ्या गाड्या पकडण्यासाठी प्रवाशांच्या लांब रांगा लागत आहेत.