सळ्यांच्या ट्रकवर टेम्पो आदळला; बापलेकासह पाच ठार, १३ जखमी

नाशिकमध्ये आयशर ट्रकला पाठीमागून जीपची धडक होऊन मोठा अपघात झाला.

अझहर शेख

नाशिक : निफाड तालुक्यातील धारणगाव येथून धार्मिक कार्यक्रम आटोपून सिडकोकडे परतताना द्वारका चाैकाच्या अलीकडे उड्डाणपूलावर पुरूष भाविकांचा टेम्पो पाठीमागून लोखंडी सळ्यांच्या ट्रकवर (एम.एच२५ यू ०५०८) जाऊन आदळला. या भीषण अपघातात पाच जण जागीच ठार झाले असून यामध्ये संतोष व अतुल मंडलिक या बापलेकाचाही समावेश आहे. तेरा भाविक गंभीररित्या जखमी झाले आहे. ही दुर्घटना रविवारी (दि.१२) सायंकाळी साडेसात वाजेच्या सुमारास घडली. मयत झालेले पाचही लोक सिडकोमधील रहिवासी होते.

नाशिक शहरातील सिडको सह्याद्रीनगरमधील रहिवासी असलेले चेतन गंभीरे यांच्या घरी धार्मिक कार्यक्रम (कारण) आयोजित करण्यात आला होता. या कार्यक्रमासाठी रविवारी सकाळी परिसरातील महिला व पुरूष हे दोन स्वतंत्र टेम्पोमधून प्रवास करून नैताळेगावाच्या पुढे असलेल्या धारणगाव येथील धार्मिकस्थळी गेले होते. सायंकाळी कार्यक्रम आटोपून परतीचा प्रवास करताना अगोदर महिला भाविकांना घेऊन टेम्पो नाशिकच्यादिशेने रवाना झाला. हा टेम्पो सह्याद्रीनगर येथे पोहचून काही वेळ होत नाही, तोच पुरूषांच्या टेम्पोला (एम. एच१५ एफ.व्ही ५६०१) द्वारका चौकाच्या अलीकडे उड्डाणपूलावर भीषण अपघात झाला.

अपघात इतका भीषण होता की, टेम्पोचा चक्काचूर झाला. कॅबिनमध्ये लोखंडी सळ्या शिरल्या. घटनेची माहिती मिळताच भद्रकाली पोलिस, वाहतूक शाखेचे पोलिस, अग्निशमन दलाचा बंब, १०८च्या तीन रूग्णवाहिकांसह काही खासगी रूग्णवाहिका वेगाने घटनास्थळी पोहचल्या. आपत्कालीन बचावकार्य तातडीने सुरू करण्यात आले. काही जखमींना लेखानगरच्या खासगी रुग्णालयात तर काहींना शासकिय जिल्हा रूग्णालयात हलविण्यात आले.

 मृतांची नावे अशी... 

१)अतुल संतोष मंडलिक (२२), २) संतोष मंडलिक (५६), 
३) यश खरात, 
४) दर्शन घरटे, 
५) चेतन पवार (१७)

 जखमींची नावे अशी... 

१) सार्थक (लकी) सोनवणे, २) प्रेम मोरे, ३) राहुल साबळे, ४) विद्यानंद कांबळे, ५) समीर गवई, ६) अरमान खान, ७) अनुज घरटे, ८) साई काळे, ९) मकरंद आहेर, १०) कृष्णा भगत, ११) शुभम डंगरे, १२) अभिषेक, १३) लोकेश (दोघांची पुर्ण नावे समजू शकलेले नाही)