राष्ट्रवादीसाठी शरद पवार उतरणार रणांगणात

राष्ट्रवादीसाठी शरद पवार उतरणार रणांगणात

नाशिक : जिल्ह्यातील राष्ट्रवादीचे आजी-माजी लोकप्रतिनिधी तसेच पदाधिकारी एका पाठोपाठ कायदेशीर चौकटीत अडकत असताना सैरभैर झालेल्या राष्ट्रवादी कॉँग्रेसचे डॅमेज कंट्रोल सावरण्यासाठी स्वत: पक्षाध्यक्ष माजी केंद्रीयमंत्री शरद पवार नाशिकला येणार आहेत. जिल्हा परिषदेत सत्तेवर असलेल्या राष्ट्रवादीसमोर सत्तेत टिकण्याचे प्रमुख आव्हान आहे. शनिवारी (दि.३१) यासंदर्भात राष्ट्रवादी कॉँग्रेसच्या महत्त्वाच्या पदाधिकाऱ्यांची बैठक झाली. बैठकीत ५ जानेवारीला शरद पवार यांच्या उपस्थितीत पिंपळगाव बसवंत कृषी उत्पन्न बाजार समितीच्या आवारात हा शेतकरी मेळावा आयोजित करण्यात आला आहे. या मेळाव्यात राष्ट्रवादी कॉँग्रेसकडून इच्छुक असलेल्यांनाही बोलविण्यात आले असून, मेळाव्यानंतर प्रमुख नेत्यांशी शरद पवार चर्चा करणार असल्याचे समजते. ४ जानेवारीलाच शरद पवार नाशिक मुक्कामी येत असून, त्यात आगामी महापालिका व जिल्हा परिषद निवडणुकांबाबत प्रमुख पदाधिकाऱ्यांशी चर्चा करणार असल्याचे समजते. माजी उपमुख्यमंत्री आमदार छगन भुजबळ यांनी जिल्ह्णात राष्ट्रवादीच्या ताब्यात महत्त्वाच्या स्थानिक स्वराज्य संस्था व सहकारी संस्था कशा राहतील, हे पाहिले होते. मात्र त्यांना व माजी खासदार समीर भुजबळ यांना अटक झाल्यानंतर काही महिन्यांपासून राष्ट्रवादी कॉँग्रेसमध्ये काहीसे वातावरण सैरभैर झाले होते. त्यातच काही दिवसांपूर्वी माजी खासदार कृषी उत्पन्न बाजार समिती सभापती देवीदास पिंगळे, शहर कार्याध्यक्ष छबू नागरे, रामराव पाटील यांनाही अटक झाल्यानंतर राष्ट्रवादीची प्रतिमा मलीन झाल्याचे बोलले जात होते. जिल्हा परिषदेत राष्ट्रवादीचे सर्वाधिक २७ सदस्य असून, अध्यक्ष-उपाध्यक्ष पदही राष्ट्रवादीच्या ताब्यात आहे. मात्र काही दिवसांपूर्वीच झालेल्या नगरपालिका निवडणुकांमध्ये चार ठिकाणी नगराध्यक्ष असलेल्या राष्ट्रवादीला मोठा फटका बसल्याने राष्ट्रवादीची विस्कटलेली घडी बसविण्यासाठी आता शरद पवार स्वत: लक्ष घालणार असल्याचे बोलले जाते. पिंपळगाव बसवंत शेतकरी मेळाव्याच्या निमित्ताने शरद पवार आगामी निवडणुकांचे  रणशिंग फुंकणार आहे.
(प्रतिनिधी)