जिल्हा रुग्णालयाच्या स्वच्छतागृहात रुग्णाने घेतला गळफास

त्याच्या आत्महत्येमागील नेमके कारण समजू शकलेले नाही. त्याने दिलेल्या नातेवाईकांच्या भ्रमणध्वनीक्रमांकावर रात्रीउशिरापर्यंत जिल्हा रुग्णालय प्रशासनाकडून संपर्क साधला जात होता

नाशिक : येथील जिल्हा शासकिय रुग्णालयात शनिवारी (दि.१२) एका २६वर्षीय रुग्णाने संध्याकाळच्या सुमारास येथील पुरुष सामान्य कक्षातील स्वच्छतागृहात जाऊन गळफास घेत आत्महत्या केल्याचा धक्कादायक प्रकार उघडकीस आला. याप्रकरणी सरकारवाडा पोलीस ठाण्यात रात्री उशिरापर्यंत नोंद करण्याचे काम सुरु होते.
सिन्नर येथील मुसळगावमधील रहिवाशी असलेला सचिन दादाजी सोनवणे (२६) हा जिल्हा शासकिय रुग्णालयात शुक्रवारी दुपारी तीन वाजेच्या सुमारास उपचारासाठी दाखल झाला होता. मद्यप्राशनाचे व्यसन असलेल्या या युवकाची शरीरयष्टी अत्यंत सडपातळ होती. त्याच्यावर उपचार सुरु होते; मात्र त्याने शनिवारी सायंकाळी येथील स्वच्छतागृहात जाऊन गळफास लावून घेत आपली जीवनयात्रा संपविली. दरम्यान, दुसरा रुग्ण स्वच्छतागृहात जात असताना त्याच्या हा प्रकार लक्षात आला. त्याने तत्काळ कक्षातील परिचारिकांच्या ही बाब निदर्शनास आणून दिली. घटनेची माहिती मिळताच निवासी वैद्यकिय अधिकारी, सिव्हील पोलीस चौकीतील कर्मचाऱ्यांनी धाव घेतली. सचिनच्या मृतदेह खाली उतरवून घेत पोलिसांनी पंचनामा केला यानंतर रात्री उशिरापर्यंत  पोलीस ठाण्यात अकस्मात मृत्यूची नोंद केली जात होती. त्याच्या आत्महत्येमागील नेमके कारण समजू शकलेले नाही. त्याने दिलेल्या नातेवाईकांच्या भ्रमणध्वनीक्रमांकावर रात्रीउशिरापर्यंत जिल्हा रुग्णालय प्रशासनाकडून संपर्क साधला जात होता; मात्र कुठल्याहीप्रकारचा प्रतिसाद मिळाला नसल्याचे समजते. याबाबत पुढील तपास पोलीस करीत आहेत.