असेल आमदारांची मर्जी, तरच तिकिटामध्ये सरशी!

सेना-भाजपात चढाओढ : इच्छुकांमध्ये घालमेल, हालचाली गतिमान

नाशिक : येत्या महापालिका निवडणुकीत सेना-भाजपाकडे चलनी नाणे म्हणून पाहिले जात असल्याने इच्छुकांनी उमेदवारी पदरात पाडून घेण्यासाठी प्रतिष्ठा पणाला लावली आहे. परंतु, तिकीट वाटपात दोन्ही पक्षांत आमदारांची भूमिका महत्त्वपूर्ण ठरणार असल्याने त्यांची मर्जी संपादन करण्यासाठी आमदारांभोवती वर्दळ वाढत चालली आहे. आमदारांनी आपल्या मर्जीतील उमेदवारांची यादीही तयार करून ठेवली असल्याची चर्चा आहे. महापालिका निवडणुकीत उमेदवारीसाठी सर्वाधिक स्पर्धा केंद्र व राज्यात सत्ताधारी असलेल्या सेना-भाजपात बघायला मिळणार आहे. शहरात भाजपाचे तीन व सेनेचा एक आमदार आहे. तसेच विद्यमान नगरसेवक व देवळा मतदारसंघाचे आमदार राहुल अहेर आणि भाजपात दाखल झालेले आमदार अपूर्व हिरे यांचेही शहरात कार्यकर्त्यांचे मोठे बळ आहे. त्यात भाजपाच्या शहराध्यक्षपदाची सूत्रे आमदार बाळासाहेब सानप यांच्याकडे आहेत. त्यामुळे सानप हेच तिकीट वाटपाचे मुख्य केंद्र असणार आहे. महापालिका निवडणुकीसाठी भाजपात सर्वाधिक इच्छुक आहेत. त्यामुळे तिकीट वाटपात शहराध्यक्ष सानप यांची मोठी कसोटी लागणार आहे. सानप यांच्या मर्जीतील अनेक इच्छुकांनी उमेदवारी निश्चित मानून प्रभागात प्रत्यक्ष तयारीही सुरू केली आहे. सानप यांच्याबरोबरच भाजपाचे अन्य आमदार प्रा. देवयानी फरांदे, सीमा हिरे, राहुल अहेर व अपूर्व हिरे यांच्याकडेही इच्छुकांचा राबता सुरू झाला आहे. सानप हे शहराध्यक्ष असल्याने तिकीट वाटपात वरचढ ठरतील. परंतु, सानप यांना अन्य आमदारांनाही विश्वासात घ्यावे लागणार असल्याने उमेदवारांच्या यादीत फरांदे-हिरे-अहेर यांच्याही मर्जीतील इच्छुकांची भर पडणार आहे. भाजपाच्या पाचही आमदारांनी आपल्या मर्जीतील उमेदवारांची यादी तयार केल्याचे वृत्त असून त्यानुसार, काही इच्छुकांना प्रत्यक्ष कामाला लागण्याच्या सूचनाही दिल्या आहेत. मात्र, काही प्रभागात आमदारांनी शब्द दिल्याचे सांगत कामाला सुरुवात करणाऱ्या इच्छुकांविरुद्ध तक्रारींचाही सूर पक्ष कार्यालयात ऐकायला मिळू लागला आहे. त्यामुळे, तिकीट वाटपाप्रसंगी भाजपात कलह वाढण्याची भीती व्यक्त केली जात आहे. भाजपात पाचही आमदारांचा दबदबा राहणार असतानाच शिवसेनेतही नाशिकरोड-देवळाली मतदारसंघाचे आमदार योगेश घोलप व माजी आमदार बबन घोलप यांची भूमिका महत्त्वपूर्ण मानली जात आहे. प्रामुख्याने, नाशिकरोड विभागातील उमेदवारी वाटपात घोलप यांचाच वरचष्मा राहणार असल्याचे बोलले जात आहे.