बेकायदेशीर गर्भपात प्रकरणाची महिला आयोगाकडून चौकशी

नाशिक : जिल्हा रुग्णालयातील बेकायदेशीर गर्भपात प्रकरणातील दोषींची गय केली जाणार नसल्याचे राज्य महिला आयोगाच्या अध्यक्ष विजया रहाटकर यांनी पत्रकारांशी बोलताना सांगितले़

 नाशिक : जिल्हा रुग्णालयातील बेकायदेशीर गर्भपात प्रकरणातील दोषींची गय केली जाणार नाही़ तसेच सरकारी सेवेत असतानाही खासगी रुग्णालय थाटून शासनाची व रुग्णांची फसवणूक करणाऱ्या राज्यभरातील डॉक्टरांवर कडक कारवाई केली जाणार असल्याचे राज्य महिला आयोगाच्या अध्यक्ष विजया रहाटकर यांनी पत्रकारांशी बोलताना सांगितले़ अवैध गर्भपात प्रकरणानंतर रहाटकर यांनी जिल्हा रुग्णालयास भेट देऊन संपूर्ण घटनेची जिल्हा शल्य चिकित्सक डॉ़ सुरेश जगदाळे यांच्याकडून माहिती जाणून घेतली़रहाटकर यांनी पत्रकारांशी बोलताना सांगितले की, मुलींचा जन्मदर वाढावा यासाठी शासनस्तराव प्रयत्न सुरू असून, कायदेही तयार करण्यात आले आहेत़ मात्र कायद्यातील पळवाटा शोधून जिल्हा रुग्णालयातच असे प्रकार होत असतील तर ही गंभीर बाब आहे़ मुंबई नर्सिंग अ‍ॅक्टच्या रजिस्टरमध्येही डॉ़ वर्षा लहाडे यांनी फेरफार केल्याचे समोर येत आहे़ तसेच शासनाने नियुक्त केलेल्या चौकशी पथकांनी डॉ. लहाडे यांच्या खासगी हॉस्पिटलची तपासणी केली असता त्यामध्ये संशयास्पद कागदपत्रेही आढळून आली आहेत. मुळात अशाप्रकारे खासगी रुग्णालयात सेवा देणे हा कायद्याचा भंग आहे. नाशिक महापालिकेकडे मार्चमध्ये आलेल्या निनावी तक्रारीनंतर हे प्रकरण उघडकीस आले़ कागदपत्रांमध्ये फेरफार तसेच वर्तणूक चांगली नसल्याने त्यांची पदवी रद्द करण्याचा प्रस्ताव शासनाने महाराष्ट्र मेडिकल कौन्सिलकडे पाठविला आहे़ सरकारी सेवेत असूनही खासगी सेवा देणाऱ्या डॉ़ लहाडेंबाबत जिल्हा रुग्णालयातील कोणालाच माहिती नाही याबाबत रहाटकर यांनी आश्चर्य व्यक्त केले़ या प्रकरणाची सखोल तपासणी करून लहाडे यांना प्रत्यक्ष व अप्रत्यक्ष मदत करणाऱ्यांची चौकशी करून कायदेशीर कारवाई केली जाणार आहे़ तसेच राज्यात अशा प्रकारचे वैद्यकीय क्षेत्रात गुन्हे करणाऱ्या व रुग्णांच्या जीवाशी खेळणाऱ्या डॉक्टरांची गय केली जाणार नाही, असेही विजया रहाटकर यांनी यावेळी स्पष्ट केले.या प्रकरणाची आरोग्य विभागाकडून सखोल चौकशी सुरू असून, अहवाल प्राप्त होताच फौजदारी गुन्हा दाखल केला जाणार असल्याचेही रहाटकर यांनी सांगितले. यावेळी महापालिका वैद्यकीय अधिकारी डॉ. विजय डेकाटे, स्थायी समिती सभापती शिवाजी गांगुर्डे, भाजप गटनेते संभाजी मोरूस्कर, नगरसेवक उद्धव निमसे आदिंसह भाजपा महिला पदाधिकारी तसेच विविध आघाडींच्या पदाधिकारी उपस्थित होत्या. (प्रतिनिधी)