भोंदू अशोक खरातला तीन दिवसांची पोलीस कोठडी, तपासात सहकार्य करीत नसल्याचा न्यायालयात युक्तिवाद

सुनावणीदरम्यान भोंदू खरातची पोलीस कोठडी वाढवून मिळावी, अशी मागणी सरकारी वकिलांकडून करण्यात आली. युक्तिवादानंतर, खरातला पुन्हा तीन दिवसांची पोलीस कोठडी सुनावण्यात आली आहे.

नाशिक : लैंगिक अत्याचार तसेच फसवणूक प्रकरणी दाखल गुन्ह्यात अटकेत असलेल्या भोंदू बाबा अशोक खरातला आज ११.५४ वाजण्याच्या सुमारास नाशिक जिल्हा सत्र न्यायालयात आणण्यात आले होते. सुनावणीदरम्यान भोंदू खरातची पोलीस कोठडी वाढवून मिळावी, अशी मागणी सरकारी वकिलांकडून करण्यात आली. युक्तिवादानंतर, खरातला पुन्हा तीन दिवसांची पोलीस कोठडी सुनावण्यात आली आहे.

दरम्यान, सरकारी वकील बागडे यांनी जोरदार युक्तिवाद केला. यावेळी, आरोपी खरात याच्याकडून अद्याप बरीच माहिती येणे बाकी आहे. तसेच त्याने बंदुकीचा वापर कुठे केला? याची माहितीही पोलीस तपासात समोर आलेली नाही. गेल्या दोन दिवसांत आणखी दोन फिर्यादी पुढे आल्याने, यांची कशा पद्धतीने फसवणूक झाली? याचा तपासही बाकी आहे. यामुळे खरात याला पोलिस कोठडी वाढवून मिळावी, अशी मागणी सरकारी वकिलांनी न्यायालयाला केली. तसेच, फिर्यादींच्या वकिलांनी भोंदू खरात पोलिसांपासून माहिती लपवत असल्याचेही न्यायालयाला सांगितले.