‘सामान्यातील असामान्यांचा’ अटल सेवा पुरस्काराने गौरव

‘सामान्यातील असामान्यांचा’ अटल सेवा पुरस्काराने गौरव

नाशिक : पंतप्रधान अटलबिहारी वाजपेयी यांच्या वाढदिवसानिमित्त जनस्थान सेवा मंडळातर्फे दरवर्षी करण्यात येणारा सामान्यातील असामान्यांचा सत्कार ही कौतुकास्पद कामगिरी आहे़ जगाला फारशी माहिती नसलेली, कष्टाने व प्रामाणिकपणे काम करणारी समाजजीवनातील ही छोटी मंडळी असली तरी त्यांच्यामध्येच समाजनिर्मितीची ताकद खरी ताकद असते़ देशाला स्वराज्य मिळाले मात्र सुराज्य निर्माण करण्याचे आपल्यासमोर आव्हान आहे, असे प्रतिपादन भोसला मिलिटरी स्कूलचे कार्यवाह प्रकाश पाठक यांनी यशवंत महाराज पटांगणावर केले़  गोरेराम लेनमधील जनस्थान सेवा मंडळातर्फे शुक्रवारी (दि़ ३०) असामान्य कर्तृत्व करणाऱ्या सात व्यक्तींसह एक हजार ज्येष्ठ नागरिकांचा सत्कार करण्यात आला त्यावेळी ते बोलत होते़ ते पुढे म्हणाले की, पितृतुल्य व वडीलधारी मंडळींचा सत्कार करताना मला मनस्वी आनंद होतो आहे़ यावेळी अध्यक्ष विजय साने यांनी मंडळाचे कार्याची माहिती देत समाजातील तळागाळातील व असामान्य व विशेष कर्तृत्व केलेल्या नागरिकांचा सत्कार अनेक वर्षांपासून सुरू असल्याचे सांगितले़ यावेळी पालकमंत्री गिरीश महाजन यांनीही आपले मनोगत व्यक्त  केले़  यावेळी आमदार बाळासाहेब सानप, देवयानी फरांदे, सीमाताई हिरे, भाजपाचे प्रदेश संघटन मंत्री रवि भुसारे, उपाध्यक्ष वसंत गिते, चिटणीस लक्ष्मण सावजी, सुनील बागूल, सुहास फरांदे, नगरसेवक माधवी जाधव, सुरेश पाटील, हरीश लोणारी आदि उपस्थित होते़ (प्रतिनिधी)