नोटाबंदीनंतर आज प्रथमच नोटप्रेस कामगारांना रविवारची सुटी

नोटाबंदीनंतर आज प्रथमच नोटप्रेस कामगारांना रविवारची सुटी

नाशिकरोड : केंद्र शासनाने ५०० व एक हजाराची नोट चलनातून रद्दबातल ठरविल्यानंतर गेल्या ५० दिवसांपासून चलार्थपत्र मुद्रणालयात अहोरात्र नोटा छपाईचे काम सुरू असून, सातही रविवारी सुट्टी न घेता काम करणाऱ्या कामगारांना नववर्षाच्या पहिल्या रविवारी काहिसा दिलासा मिळाला आहे. मुद्रणालय प्रशासन व कामगार नेत्यांमध्ये चर्चा होऊन रविवारी (दि. १ जानेवारी) कामगारांना सुट्टी देण्याचा निर्णय घेण्यात आला आहे. कामगारांनी दररोज जादा वेळ काम करून विविध दरांच्या १०५० दशलक्ष नोटा (१०५ कोटी) छापल्या आहेत. शनिवारी सर्वाधिक ५१ दशलक्ष नोटा छापून रवाना करण्यात आल्या.  केंद्र शासनाने गेल्या ८ नोव्हेंबर रोजी देशाच्या चलनातून ५०० व एक हजाराची नोट चलनातून रद्दबातल ठरविल्या. यामुळे गेल्या ५० दिवसांपासून विविध दरांच्या चलनांचा मोठा तुटवडा निर्माण झाला आहे.  गेल्या ५० दिवसांत चलार्थपत्र मुद्रणालयातून शनिवारी (दि.३१) सर्वाधिक विविध दरांच्या ५१ दशलक्ष नोटा छापल्या. नोटा रद्दबातल ठरविल्यानंतर गेल्या ५० दिवसांत चलार्थपत्र मुद्रणालय कामगारांनी सलग सात रविवार सुट्टी न घेता व दररोज जादा वेळ काम करत विविध दरांचे चलन विविध अडचणीचा सामना करून यशस्वीपणे छापले आहे. मुद्रणालय महामंडळाचे व्यवस्थापकीय संचालक प्रवीण गर्ग, मानव संसाधन संचालक के.एस. सिन्हा, तांत्रिक संचालक अजय श्रीवास्तव यांच्यासोबत नुकतीच मुद्रणालय मजदूर संघाचे सरचिटणीस जगदीश गोडसे, कार्याध्यक्ष ज्ञानेश्वर जुंद्रे, उपाध्यक्ष सुनील आहिरे यांची बैठक झाली. यामध्ये गेल्या सात रविवार सुट्टी न घेता काम करणाऱ्या चलार्थपत्र मुद्रणालय कामगारांना रविवार १ जानेवारी रोजी सुट्टी देण्याची केलेली मागणी मान्य करण्यात आली आहे. तसेच यापुढे दररोज २ तास जादा काम करून रविवारी सुट्टी देण्यात यावी या मागणीवर विचार सुरू असून, लवकरच निर्णय घेण्यात येणार आहे. (प्रतिनिधी)