खरेदीचा उत्साह : साधला ‘सुवर्ण मुहूर्त’

कोट्यवधींची उलाढाल

नाशिक : ‘दसरा सण मोठा, नाही आनंदाला तोटा’ असे म्हणत नाशिककरांनी सकाळपासूनच बाजारात सोने, गृहोपयोगी वस्तू, वाहने खरेदीसाठी गर्दी केली होती. चोख सोन्याच्या वेढ्यापासून टेम्पल दागिन्यांना महिलांची मागणी दिसून आली. साडेतीन मुहूर्तांपैकी एक असलेल्या विजयादशमीच्या औचित्यावर शहराच्या बाजारपेठेत कोट्यवधींची उलाढाल झाली.विजयादशमीच्या औचित्यावर बाजारपेठ चांगलीच बहरली. नागरिक बिनधास्तपणे खरेदीसाठी घराबाहेर पडले. दोन दिवसांपूर्वीच्या आंदोलनाचा कुठलाही परिणाम यावेळी जाणवला नाही. सर्वत्र उत्साहात खरेदी-विक्रीचे व्यवहार सुरू होते. ठिकठिकाणी झेंडू, कांचनची पाने विकणाऱ्या विक्रेत्यांनी दुकाने थाटली होती. दुपारनंतर बाजारपेठेत नागरिक मोठ्या संख्येने आल्याने सर्वच व्यावसायिकांच्या चेहऱ्यावर आनंदाचे वातावरण होते. रविवारच्या संतप्त आंदोलनामुळे व्यापारी वर्ग काही प्रमाणात चिंतेत होता. कारण सोमवारी दिवसभर शहर बससेवाही सुरू झालेली नव्हती; मात्र सोमवारी सकाळपासूनच मोबाइल इंटरनेट सेवा खंडित झाल्याने तणाव पूर्णपणे निवळण्यास मदत झाली आणि अफवांचे फुटणारे पेवही आटोक्यात आले. मंगळवारी (दि.११) सकाळपासूनच शहरासह उपनगरांमध्ये विजयादशमीचा उत्साह दिसून येत होता. मुख्य बाजारपेठ म्हणून ओळखल्या जाणाऱ्या मेनरोड परिसरात दुपारी तीन वाजेनंतर नागरिकांची गर्दी उसळली होती.