कॉँग्रेस, राष्ट्रवादीची ‘एकला चलो’ची भूमिका

महापालिका निवडणूक : सक्षम पॅनलसाठी शोधाशोध

संदीप झिरवाळ : पंचवटी
आगामी महापालिका निवडणुकीच्या पार्श्वभूमीवर पंचवटी विभागात शिवसेना, भाजपा, मनसे, कॉँग्रेस व राष्ट्रवादी कॉँग्रेस या पक्षांकडून निवडणूक लढविणाऱ्या इच्छुकांची तयारी सुरू झाली आहे. यंदा चार जागांसाठी प्रभाग असून सक्षम उमेदवार मिळत नसल्याने कॉँग्रेस, राष्ट्रवादी कॉँग्रेसने ‘एकला चलो रे’ची भूमिका घेतल्याने कॉँग्रेस, राष्ट्रवादी कॉँग्रेससाठी महापालिका निवडणूक कसोटी ठरणार आहे.
पंचवटी विभागात सहा प्रभाग असून, प्रत्येक प्रभागात चार याप्रमाणे २४ सदस्य असणार आहेत. आरक्षण व प्रभाग रचना बदलल्याने काही लोकप्रतिनिधींचा पत्ता कट झाला असल्याने त्यांनी आरक्षणानुसार कुटुंबातील सदस्यांना यंदा निवडणुकीच्या रिंगणात उतरविण्याची तयारी सुरू केली आहे. पंचवटी विभागात अद्याप कोणत्याही पक्षाकडे चार उमेदवारांचे पॅनल पूर्ण झालेले नाही. एकेका प्रभागातून पाच ते सहा जण एकाच जागेसाठी इच्छुक असल्याने उमेदवार चाचपणीसाठी पक्षश्रेष्ठींची कसोटी लागणार आहे. पंचवटीत भाजपा, शिवसेनेकडे सर्वाधिक इच्छुक उमेदवार आहेत तर या उलट परिस्थिती मनसेची आहे. मनसेकडे ठराविक प्रभाग सोडले तर सक्षम उमेदवारच नसल्याने मनसेला उमेदवाराचा शोध घ्यावा लागणार आहे. कॉँग्रेसकडून निवडणूक लढविण्याची तयारी अनेकांनी केली असली तरी अद्याप प्रभागनिहाय कोणत्याही उमेदवाराचे नाव पुढे येत नसल्याने व पाहिजे तशी तयारी सुरू न केल्याने कार्यकर्ते संभ्रमात पडले आहेत.  राष्ट्रवादी कॉँग्रेसची काहीशी अशीच परिस्थिती आहे. उमेदवारी जाहीर झालेली नसली तरी काही इच्छुकांनी गुडघ्याला बाशिंग बांधून स्वत:लाच उमेदवार मानून प्रभागात प्रचार सुरू केला आहे. शिवसेना, भाजपाकडे उमेदवार असले तरी अद्याप उमेदवारी कोणाला मिळणार हे जाहीर केलेले नाही. तर राष्ट्रवादी कॉँग्रेसकडे काही ठराविक प्रभागात सक्षम उमेदवार सोडले तर उमेदवार नसल्याने चार जागांसाठी पॅनल निर्मिती कशी होणार, हा मोठा प्रश्न आहे. सध्या राष्ट्रवादी कॉँग्रेसकडून इच्छुक असलेल्या काही उमेदवारांनी स्वत:च परिचय पत्रके छापून स्वत:ची छबी त्यावर उमटवून लोकप्रतिनिधी नसताना केलेल्या कामाचा आढावा प्रसिद्ध करून एकटे फिरून स्वत:चाच प्रचार करण्याचा धडाका लावला असल्याचे दिसून येते.