'कॅश नेटवर्क'द्वारे खरातने उभे केले आर्थिक साम्राज्य; डिजिटल पुरावा मागे न ठेवण्याबाबत विशेष दक्ष

खरात कोणताही डिजिटल पुरावा मागे न ठेवण्याबाबत विशेष दक्ष

नाशिक : भोंदूगिरीच्या आडून शेकडो कोटींची माया जमवणाऱ्या अशोक खरातच्या व्यवहाराचे धक्कादायक तपशील एसआयटीच्या तपासातून समोर आले आहेत. योजनाबद्ध पद्धतीने आर्थिक व्यवहार करणारा खरात कोणताही डिजिटल पुरावा मागे न ठेवण्याबाबत विशेष दक्ष असल्याचे बँक डिटेल्समधून स्पष्ट होते. यासाठी त्याने आपले 'कॅश नेटवर्क' उभे केले होते.

तपास पथकाने खरातची चार बैंक खाती तपासली असता, फिर्यादी किंवा तक्रारदारांकडून थेट ऑनलाइन व्यवहार झाल्याचे आढळले नाही. ७० टक्के व्यवहार तो कॅश स्वरूपात करीत असे.

जमीन खरेदी करताना तो स्वतःच्या किंवा पत्नीच्या नावाने खरेदी न करता पार्टनरचे नाव खरेदीखतात नमूद करीत असे. त्यामुळे एकाच्या नावे फार मोठी उलाढाल दिसत नसे. बहुतांश व्यवहार तो रोख स्वरूपातच करत असल्याने त्याच्या फसवणुकीचा माग काढणे कठीण जात असल्याचे सूत्रांनी सांगितले.

नातेवाइकांच्या खात्यांचाही तपास

खरातचा ऑफिसबॉय नीरज  जाधव याच्याही खात्यावर मोठी रक्कम वर्ग झालेली नाही, सध्या त्याच्या खात्यांमध्ये ३० ते ४० लाख रुपये शिल्लक आढळले.

नेवासा येथील एका व्यापाऱ्याची अडीच लाखांची फसवणूक करताना, खरातने धनादेश परत करून रोख रकमेची मागणी केल्याची बाब समोर आली आहे. आता भोंदू खरातच्या नातेवाइकांच्या खात्यांचाही तपास सुरू असून, त्याच्या 'कॅश नेटवर्क'मधील प्रत्येक धागा उलगडण्याचा प्रयत्न सुरू आहे.

भोंदूबाबा खरातला आज न्यायालयात हजर करणार 

अशोक खरातच्या पोलिस कोठडीची मुदत संपणार असल्याने रविवारी त्याला पुन्हा जिल्हा न्यायालयात हजर करण्यात येणार आहे. पोलिस कोठडी दरम्यान झालेल्या चौकशीतून अनेक धक्कादायक बाबी उघडकीस येण्याची शक्यता आहे.