आरक्षणासाठी मुस्लीम समाजाचा ७ ला मोर्चा

मालेगाव : मुस्लीम रिझर्व्हेशन फेडरेशनचा एल्गार

मालेगाव : आरक्षणासाठी मराठा समाजाच्या मोर्चांपाठोपाठ आता मुस्लीम समाजानेही मोर्चा काढण्याचा निर्णय घेतला आहे. मालेगावी मुस्लीम रिझर्व्हेशन फेडरेशनच्या बैठकीत येत्या ७ आॅक्टोबर रोजी आमदार आसिफ शेख यांच्या नेतृत्वाखाली मोर्चा काढण्यात येणार आहे.२०१४ मध्ये आघाडी सरकारने मराठा समाजास १६ टक्के व मुस्लीम समाजास पाच टक्के आरक्षण जाहीर केले होते. याच दरम्यान राज्यात सत्तांतर होऊन युतीचे शासन आले. न्यायालयाने दोन्ही समाजाचे आरक्षण रद्द केले; परंतु मुस्लीम समाजास शिक्षणात पाच टक्के आरक्षण देण्याचा सल्ला दिला होता. मात्र शासनाने त्यावर विचार केला नाही. परिणामी मुस्लीम समाजास नोकरी व शिक्षणात पाच टक्के आरक्षण देण्यात यावे, उच्च शिक्षणासाठी शंभर टक्के शिष्यवृत्ती द्यावी, राज्यातील एक लाख एकर जमीन वक्फ बोर्डाची असून, यापैकी सत्तर हजार एकर जमिनीवर अतिक्रमण आहे हे अतिक्रमण काढण्यात यावे, वक्फ बोर्डाच्या जमिनीद्वारे मिळणारे उत्पन्न मुस्लीम समाजाच्या विकासावर खर्च करण्यात यावे, सच्चर कमिटी, महेमूद-उल रहेमान व रंगनाथ मिश्रा आयोगाच्या शिफारशी लागू करण्यात याव्या, दलित वस्ती सुधार कार्यक्रम राबवून मुस्लीम समाजास सुविधांसाठी शंभर टक्के निधी द्यावा या मागण्यांसाठी मालेगाव शहरातून मुस्लीम रिझर्व्हेशन फेडरेशनतर्फे मोर्चा काढण्यात येणार आहे. यावेळी अ‍ॅड. हिदायतुल्लाह अन्सारी, अ‍ॅड. नियाज अहमद लोधी, मौलाना अय्युब कासमी, गुफरान अन्सारी यांनी मार्गदर्शन केले. बैठकीस सय्यद लियाकत अली, मोहंमद अतीक शाबान, आमीन सरदार, मोहंमद हलीम सिद्दीकी, प्रा. मजीद सिद्दीकी यांच्यासह मोठ्या संख्येने मुस्लीम बांधव उपस्थित होते. यावेळी शहरातील अनेक संस्था, संघटना, सोसायटींनी आंदोलनास लेखी स्वरूपात पाठिंबा दिला आहे. (प्रतिनिधी)मुस्लीम समाजाला एकत्र येण्याची गरज मराठा समाज आरक्षणासाठी रस्त्यावर येत आहे. काही घटकांनी ंमिुस्लिमांना आरक्षण मिळू नये म्हणून आपली भूमिका पार पाडली आहे. त्यामुळे मुस्लीम समाजामध्ये असंतोषाचे वातावरण निर्माण होत आहे.मुस्लीम समाजाला एकत्र येण्याची गरज असल्याचे मत यावेळी व्यक्त करण्यात आले.