लोकमत न्यूज नेटवर्क
नंदुरबार : जिल्हा रुग्णालयात अत्याधुनिक आरटीपीसीआर प्रयोगशाळा सुरू झाली, परंतु मायक्रोबॉयलॉजिस्टची कमतरता, कर्मचाऱ्यांचे प्रशिक्षण, आरएनए वेगळे करण्याचे उपकरण यांच्या अभावामुळे ही प्रयोगशाळा उद्घाटनानंतर तिसºया दिवशीही पुर्ण क्षमतेने काम करीत नसल्याची स्थिती आहे. पुर्ण क्षमतेने अर्थात दररोज १२०० स्वॅब अहवाल तपासणीच्या कामास पुढील आठवडा उजाडणार आहे. दरम्यान, मंगळवारी दुपारपर्यंत तब्बल ७१७ अहवाल वेटींगवर होते.
नंदुरबारातील कोरोना अहवाल तपासणीस धुळे प्रयोगशाळेत लागणारा उशीर लक्षात घेता नंदुरबारातही अत्याधुनिक प्रयोगशाळा सुरू करावी अशी मागणी होत होती. दोन महिन्यांपूर्वी पालकमंत्री अॅड.के.सी.पाडवी यांनी ही प्रयोगशाळा येथे मंजूर करून आणली. परंतु प्रत्यक्षात उपकरणे यायला आॅगस्ट उजाडला आणि प्रत्यक्षात प्रयोगशाळा सुरू होण्यास १५ आॅगस्ट उजाडला. साधारणत: दीड कोटी रुपये खर्च करून ही प्रयोगशाळा सुरू करण्यात आली आहे. परंतु प्रशिक्षीत कर्मचाऱ्यांचा अभाव आणि इतर तांत्रिक बाबी यामुळे या प्रयोगशाळेतील काम अद्यापही पुर्ण क्षमतेने सुरू झालेले नसल्याची स्थिती आहे. त्यामुळे जिल्ह्यातील कोरोना स्वॅब अहवालांची प्रतिक्षा वाढतच चालली आहे. गेल्या आठ दिवसांपासून तब्बल ६०० पेक्षा अधीक स्वॅब वेटींगवर राहत आहे. मंगळवारी दुपारी ही संख्या ७१७ पर्यंत गेली होती.
१०० च्या आतच तपासणी
सद्यस्थितीत आरटीपीसीआर प्रयोगशाळेत केवळ ५० ते १०० स्वॅब तपासणी होत आहे. नवीन सुरू झालेली प्रयोगशाळा, नवीनच प्रशिक्षीत असलेले कर्मचारी यामुळे सर्व काळजी घेऊन आणि खात्री करूनच स्वॅब तपासणी केली जात आहे. येथील अहवाल पडताळून घेतल्यानंतरच ते जाहिर करण्यात येत आहे. हळूहळू या ठिकाणी स्वॅब तपासणी वाढविण्यात येणार आहे. पुढील आठवड्यापर्यंत पुर्ण क्षमतेने प्रयोगशाळेत तपासणी होणार असल्याची माहिती अतिरिक्त जिल्हा शल्य चिकित्सक डॉ.के.डी.सातपुते यांनी दिली.
स्थानिक कर्मचाºयांना प्रशिक्षण
आरटीपीसीआर प्रयोग शाळेत १५ ते २० कर्मचाºयांची आवश्यकता असते. त्यानुसार सद्यस्थितीत १५ स्थानिक कर्मचारी या ठिकाणी नियुक्त करण्यात आले आहेत. ते सर्व जिल्हा रुग्णालय, उपजिल्हा व ग्रामिण रुग्णालयातील कर्मचारी आहेत. त्यांना गेल्या १५ दिवसात आवश्यक ते प्रशिक्षण दिले गेले आहे.
सुरुवातीला धुळे प्रयोग शाळेत तपासलेले अहवाल पुन्हा तपासणीसाठी येथे पाठविण्यात येत होते. तेथील प्रयोगशाळेतील निष्कर्ष व येथील निष्कर्ष यांची पडताळणी केली जात होती. त्यात ९० टक्के निष्कर्ष बरोबर निघाल्याने प्रशिक्षीत कर्मचाºयांना आत्मविश्वास आल्याने आता ही प्रयोगशाळा सुरू करण्यात आली आहे.
मायक्रोबॉयलॉजिस्ट दाखल
प्रयोगशाळेची मुख्य धूरा सांभाळणारे अधिकारी हे मायक्रोबॉयलॉजिस्ट असतात. वैद्यकीय महाविद्यालयातच त्यांची नियुक्ती असते. त्यामुळे नंदुरबारातील प्रयोग शाळेसाठी इतर जिल्ह्यातून संबधीत तज्ज्ञ यांना पाचारण करण्यात आले.
धुळ्यातील संबधीत तज्ज्ञ हे धुळे प्रयोगशाळेसाठी आरक्षीत आहेत. त्यामुळे नंदुरबारातील प्रयोगशाळेसाठी बीड येथून हे तज्ज्ञ मागवावे लागले आहेत. सोमवारी सायंकाळी ते येथे दाखल झाले. मंगळवारी त्यांनी पदभार सांभाळला.
आरएनए अलगीकरण उपकरणही झाले दाखल
प्रयोगशाळेत आरएनए अलगीकरण उपकरणाची कमरता होती. आता ते देखील दाखल झाले आहे. या उपकरणातून स्वॅबमधून आरएनए वेगळा केला जातो. ते देखील उपलब्ध झाल्याने कामाला गती येणार आहे.
मंगळवारी दुपारपर्यंत तब्बल ७१७ अहवाल वेटींगवर होते. त्यात सर्वाधिक अहवाल हे नंदुरबार व शहादा तालुक्यातील आहेत. नंदुरबार तालुक्यातील २५१ इतके होते. शहादा तालुक्यातील २६७, तळोदा तालुक्यातील ९६, नवापूर तालुक्यातील ८३, अक्कलकुवा तालुक्यातील १६, धडगाव तालुक्यातील एकही नाही तर निझर, शिरपूर, निजामपूर येथील चार अहवाल वेटींगवर होते.
४नंदुरबारात अहवाल वेळेवर येत नसल्याने अनेक रुग्ण थेट सुरत येथे जाऊन खाजगी लॅबमध्ये तपासणी करून घेत आहेत. तेथेच उपचार घेऊन तेथूनच बरे होऊन येत असल्याचेही चित्र आहे.