म्हसावद पोलिसांकडून वाहनधारकांची अडवणूक

निवेदनात म्हटले आहे की, शहादा-धडगाव रस्त्यावर चिखली फाटा चौफुलीवर असलेले पोलीस कर्मचारी, वाहतूक पोलीस, होमगार्ड यांनी दिलेल्या वेळेत सकाळी सात ते ११ वाजेच्या कालावधीत परिसरातील नागरिक, शेतकरी दैनंदिन कामकाज, बँक, पोस्ट ऑफिस, दवाखाना या कामानिमित्त ये-जा करतात. मात्र, पोलीस कर्मचारी फारच त्रास देतात. नागरिक सामाजिक अंतर ठेवून, मास्क लावून वाहन चालवत असले तरी बळजबरीने २०० रुपयांची दंड पावती देत असल्याने जनतेची मने दुखावली जात असल्याचे निवेदनात म्हटले आहे. सकाळी सात ते ११ ही वेळ बाजारहाट, दवाखाना, मेडिकल, शेतकरी यांच्यासाठी खुली आहे. मात्र, याच वेळेत पोलीस तपासणी करतात आणि ११ वाजेनंतर मात्र पोलीस नसतात. ११ वाजेनंतर तपासणी करणे गरजेचे असताना खुल्या वेळेतच त्रास दिला जातो. मग नागरिक जातील केव्हा? व परिसरातील गरीब जनतेची लूट थांबवावी, अशी मागणी केली आहे. हा प्रकार थांबावा म्हणून म्हसावद पोलीस स्टेशनचे पोलीस निरीक्षक निवृत्ती पवार यांना निवेदन देण्यात आले. निवेदनावर शहादा तालुका काँग्रेसचे अध्यक्ष डॉ. सुरेश नाईक, पं. स. सदस्य सत्येन वळवी, डॉ. जाधव ठाकरे, दिलीप पावरा, मडकाणीचे सरपंच प्रल्हाद पवार, राणीपूरचे सरपंच संतोष पावरा, तारसिंग ठाकरे (आमोदा), ओंकार पटले (नवागाव), विनायक पावरा, केशव पावरा (रामपूर), संदीप वळवी, लाला धनगर यांच्या सह्या आहेत.