शाॅर्ट सर्किटमुळे आग लागण्याचे प्रकार राज्यातील विविध भागांत घडत आहेत. यात सर्वांना वीजपुरवठा देत उजेड देणा-या वीज वितरण कंपनीच्या कार्यालयांमध्येच सुरक्षेबाबत अंधार असल्याचे चित्र दिसून आले आहे. शहरातील गिरीविहार, नेहरूनगर, बाजार समिती परिसरात या कार्यालयांमध्ये भेटी दिल्या असता, येथील दिवे, स्वीच हे गेल्या अनेक काळात बदलण्यात आलेले नाही. अनेक ठिकाणी वायरिंगही खराब झाल्याचे दिसून आले आहे. गिरीविहार येथील इंदिरासंकुलातील कार्यालय एका छोट्याशा जागेत सुरू आहे. यातून वीजकंपनीकडूनच कर्मचारी सुरक्षेबाबत उदासीन भूमिका असल्याचे दिसून आले. नंदुरबार जिल्ह्यात वीज वितरण कंपनीचे दोन विभाग आहेत. यात शहादा आणि नंदुरबार या दोन विभागांत स्वतंत्र कार्यालये आहेत. नंदुरबार शहरात बसस्थानक परिसरात वीज वितरण कंपनीचे कार्यालय आहे. अत्यंत मोकळी अशी इमारत असतानाही अडगळीचे स्वरूप या जागेला प्राप्त झाले आहे. जागोजागी जुनाट वीजसाहित्य टाकले आहे.
इंदिरासंकुल
शहरातील इंदिरासंकुलात शहराच्या दुस-या बाजूचा कारभार सांभाळणारे वीज कंपनीचे कार्यालय आहे. अत्यंत अडगळीच्या या जागेत अधिका-यांना कधी-कधी बसण्यासही जागा नसल्याचे दिसून येते. यात प्रामुख्याने या कार्यालयात एकच लाइट लावून रात्रीच्या वेळी कामकाज केले जाऊ शकते.
बसस्थानक परिसर
नंदुरबार बसस्थानकासमोर वीज वितरण कंपनीच्या कार्यकारी अभियंता यांचे कार्यालय आहे. याठिकाणी अधिकारी व कर्मचारी यांची दालने आहेत. ही इमारतही कंपनीने भाडेकरार पद्धतीने घेतली आहे. या इमारतीच्या जीर्ण भिंती आणि उखडलेली इलेक्ट्रिक फिटिंग कंपनीच्या बेफिकीर कामकाजाची साक्ष देते. याठिकाणी अग्निरोधक यंत्रेही दिसून आलेली नाहीत.
बाजार समिती
अधीक्षक अभियंता यांचे कार्यालय बाजार समिती परिसरात रस्त्याला लागून आहे. ही इमारतही जुनीच आहे. या इमारतीचेच ऑडिट होण्याची आवश्यकता आहे. आतील भागात काही चांगल्या सोयी असल्या, तरीही इलेक्ट्रिक ऑडिटबाबत मात्र उदासीनता असल्याचे दिसून आले आहे. अनेक ठिकाणी विजेचे दिवे आणि इमारतीच्या भिंतीवरील वायरी बाहेर आल्याचे दिसून आले.