पालिकेच्या १० भागांमध्ये टाॅवरचे १२ लाख रूपये थकीत

नंदुरबार - विविध खासगी मोबाईल कंपन्यांच्या टाॅवरला जागा देत त्यांच्याकडून भाडेवसुली करणाऱ्या मालमत्ताधारकांकडे पालिकेचा १२ लाख रूपयांचा कर थकीत आहे. या कराच्या वसुलीसाठी पालिका प्रशासनाने वेळोवेळी नोटीसही दिल्या आहेत. नंदुरबार शहरात पालिकेचे १० महसुली भाग आहेत. येथील मालमत्ताधारकांकडून विविध प्रकारची करवसुली पालिका प्रशासन करते. यात मोबाईल टाॅवरसाठी जागा भाडे कराराने देणाऱ्या मालमत्ताधारकांचाही समावेश आहे. शहरात विविध भागात २५ टाॅवर असून, त्यातील १४ जणांकडे २०१९-२० या आर्थिक वर्षातील करवसुली बाकी आहे. शहरातील सर्व १० भागांमध्ये एकूण १२ लाख ४२ हजार ७३८ रूपयांचा कर थकीत आहे. यात भाग क्रमांक १ मध्ये १ लाख ११ हजार ३७७ रूपये, भाग २ मध्ये ३ लाख ९५ हजार ९२४ रुपये, भाग ४ मध्ये ८१ हजार ५६६ रुपये, भाग ५ मध्ये १ लाख ५१ हजार ३४० रूपये, भाग ६ मध्ये ६८ हजार २०० रुपये, भाग ८ मध्ये ७३ हजार ८२ रुपये, भाग ९ मध्ये २ लाख ११ हजार ६०६ रुपये तर भाग १० मध्ये १ लाख ४९ हजार ६४३ रुपयांची करवसुली बाकी आहे. या करवसुलीसाठी पालिकेच्या पथकांकडून सातत्याने तगादा लावला जात आहे. यातील अनेकांकडे दोन वर्ष किंवा त्यापेक्षा अधिक कालावधीपासूनची रक्कम थकीत असल्याची माहिती समोर आली आहे.