लोकमत न्यूज नेटवर्क
जिल्ह्यातील कोरोना नियंत्रणात आणण्यासाठी आरोग्य विभागाने अहोरात्र मेहनत घेतली आहे. गाव पातळीवर आरोग्य केंद्रातील कर्मचारी झटले. आता लसीकरण पूर्ण करण्यासाठी मेहनत घेतली जात आहे. प्रत्येक गावात जास्तीत जास्त लसीकरण व्हावे यासाठी प्रयत्न सुरू आहेत. विविध पथके त्यासाठी प्रयत्न करीत आहेत. जिल्हाधिकारी व मुख्य कार्यकारी अधिकारी यांच्या नेतृत्वाखाली जिल्ह्यात कोरोना नियंत्रणासाठी जिल्हा परिषद आरोग्य विभागाचे प्रयत्न सुरू असल्याची माहिती जिल्हा आरोग्य अधिकारी डाॅ. एन. डी. बोडके यांनी ‘लोकमत’शी बोलताना दिली.
कोरोना नियंत्रणात येऊ लागला, आता लसीकरणाचे आव्हान कसे पेलणार?
कोरोना नियंत्रणात ग्राम पातळीवर जिल्ह्यातील आरोग्य विभागाच्या कर्मचाऱ्यांनी मोठी मेहनत घेतली. आता लसीकरणासाठी हे कर्मचारी अहोरात्र परिश्रम घेत आहेत. लसीकरणासाठी आरोग्य विभागाने ९८ सेशन साईट तयार केल्या आहेत. १६ मोबाईल टीम गाव पातळीवर जाऊन लसीकरण करून घेत आहेत. ३० जीएनम कर्मचारी त्यासाठी नियुक्त केेले आहेत. ३० मिनी बसेसद्वारे कर्मचारी ने-आण केली जात आहे. लसींचा पुरेसा साठा असल्याने एकाही केंद्रावरून एकाही व्यक्तीला परत जाण्याची वेळ येत नाही.
आरोग्य केंद्रे ठरली आधार?
कोरोना काळात इतर आजारांसाठी ग्रामीण भागात आरोग्य केंद्र व उपकेंद्र ही जनतेसाठी मोठे आधार ठरली आहेत. शहरी भागात खासगी दवाखान्यांमध्ये येण्यासाठी नागरिक धजावत नव्हते. अशा काळात आरोग्य केंद्रातील कर्मचाऱ्यांनी अशा रुग्णांना आधार देत त्यांना दिलासा दिला. कोरोना नियंत्रणाचे काम करताना आरोग्य कर्मचाऱ्यांनी आरोग्य केंद्रात ओपीडी सुरू ठेवून विविध आजारांवरील रुग्णांवर उपचार केले, ती एक आरोग्य विभागाच्या दृष्टीने समाधानाची बाब ठरली आहे.